Сэтинньи 30 күнүттэн ахсынньы 2 күнүгэр диэри Кыргызстан киин куоратыгар Бишкекка саха төрүт успуордун көрүҥэр — мас тардыһыыга VI аан дойду чөмпүйэнээтэ буолан ааста.
Чөмпүйэнээккэ 22 дойду күүстээх мадьынылара күөн көрүстүлэр, ол иһигэр Арассыыйа, Кытай, Казахстан, Монголия, Египет, Индию, Ирак уо.д.а. 200-тэн тахса спортсмен кытынна диэн успуорду сырдатар киин бэчээттэр суруйаллар.
Биһиги улууспут Кириэстээх нэһилиэгиттэн Семен Михайлов иитиллээччитэ Эльдар Ушатовтыын ситиһиилээхтик кытыннылар. Ол курдук, бэтэрээннэргэ Семен Михайлов (65 кг диэри) үһүс миэстэни ылла. Оттон эдэрдэргэ 60 кг диэри ыйааһыҥҥа Эльдар боруонсаны ылары ситистиэ.
Маны сэргэ саха фольклорун тарҕатааччы, уһуйааччы, С.А. Зверев-Кыыл Уолун аатынан норуот айымньытын киинин төрүт үгэскэ исписэлииһэ Туйаара Алексеева бу чөмпүйэнээт аһыллыытыгар кытынна. Ол курдук, кини хомуска уһуйбут уола, С.А. Зверев-Кыыл Уолун аатынан үҥкүү тыйаатырын артыыһа, хомусчут-импровизатор Георгий Слепцовтыын-Чаҕылҕанныын хомуска тэҥҥэ оонньоон дьон сэҥээриитин ыллылар (хаартыскаҕа Чаҕылҕан, Туйаара Алексеева уонна биһиги кыыспыт олоҥхоҕо уһуйбут ыччата Борис Максимов).
Дьэ бу курдук, биһиги улууспут кыахтаах, талааннаах ыччаттара дойдуларын, улуустарын ааттарын дуорааннаахтык ааттаттылар. Манна эбии биһиги бары ытыгылыыр киһибит Александр Акимов мас тардыһыытын федерациятын бэрэсидьиэнэ буоларын быһыытынан улахан таһымнөаах тэрээһини тэрийсибит үтүөлээх.
Яин ВЛАСЬЕВА