«Үөрэҕирии» национальнай бырайыагынан бу сааскыттан Сунтаар 1 №-дээх оскуолатыгар хапытаалынай өрөмүөн бара турар. Өрөмүөнү «ВИМ-Строй» тэрилтэ ыытар. Билигин эбийиэккэ 35 үлэһит үлэ араас көрүҥүн толороллор.
Ол курдук, билигин оскуолаҕа ититэр систиэмэтин бүтүннүү уларыта сылдьаллар, көрүдүөр муостатыгар кафель тэлгииллэр, кылаастар истиэнэлэрин, муостатын тэҥнээн, сыбахтаан кырааска үлэтэ барар, уот ситимин саҥардан тардаллар, канализация ситимин уларыталлар. Онон үлэ үс этээһинэн тэтимнээхтик барар. Бүгүҥҥү күн туругунан үлэ 75 % туолла диэн үлэһиттэр иһитиннэрдилэр.
Өрөмүөн барара киирэр аан кирилиэһиттэн тута биллэр. Урукку бетон кутуу кирилиэһи саҥардан, кафель тэлгээбиттэр, сынньанар саалалар уонна көрүдүөрдэр үрүттэрэ ыйанар, аныгы көстүүлээх «Армстронг» ньыматынан оҥорорго бэлэмнии сылдьаллар.
Кылаастар истиэнэлэрин оҕо сүргэтин көтөҕөр, үөрдэр өҥнөрүнэн кырааскалаабыттар. Евро түннүктэр күн уотун күүскэ киллэрэр буоланнар, кылаастар сырдык, киэҥ-куоҥ көстүүлэммиттэр.
Урукку улахан ааннары устан стандартка эппиэттиир саҥа ааннары олордорго бэлэмнээбиттэр. Бастакы этээс муостатын бүтүннүү ыһан, хас да хос сылааһы тутар матырыйаалы тэлгээн саҥардыбыттар. Онон оскуола бастакы этээһэ биллэ сылыйыахтаах. Оҕо сынньалаҥыгар аналлаах элбэх муннук баар буолуоҕа.
Оскуола өрөмүөн кэннэ биллэрдик уларыйыаҕа, сэргэхсийиэҕэ. Ол эрэн оскуола тэбэр сүрэҕэ- аактабай саала ис бараана, көстүүтэ уруккунан хаалыаҕа. Манна күүстээх реставрация- сөргүтүү үлэтэ барыаҕа.
Оскуола кэлэктиибэ, оҕолор истиэнэ муҥунан ойууламмыт саха култууратын, үгэһин көрдөрөр уруһуйу уруккутунан хааларыгар баҕараллар. Ол иһин, аактабай саалаҕа реставрация үлэтэ барарыгар истиэнэтин бэлэмнээбиттэр. Худуоһунньуктар урукку уруһуйу хаттаан уруһуйдуохтара.
Бу курдук, оскуола хас биирдии муннугар үлэ күөстүү оргуйар. Өрөмүөнү атырдьах ыйын 15 күнүгэр бүтэрэр соруктаахтар. Онон оҕолор саҥа үөрэх дьылын сырдык, ыраас, аныгылыы тыыннаммыт оскуолаҕа көрсүөхтэрэ.
Мира АФАНАСЬЕВА