«Өйдөөх уостубакка ырытар дьоҕурдаах» диэн мээнэҕэ эппэттэр. Бэҕэһээ П.Х.Староватов аатынан Элгээйи орто оскуолатыгар Уйбаан Нуолур аатынан Элгээйи модельнай, К.Е.Иванов аатынан оскуола бибилэтиэкэлэрин тэрээһиннэринэн сылын аайы ыытыллар «Уһулуччу өйдөөх» интеллектуальнай оонньуу-күрэс 5-с – 8-с кылаастар үөрэнээччилэрин ортотугар ыытылынна.
Күрэскэ өркөн өйдөрүн тургутан көрөр баҕалаах 9 оҕо кытынна. Оонньуу түһүмэҕэ 4 туртан турда. 1 турга оҕолор бары кыттан, 15 араас тиэмэҕэ 4 эппиэттэн сөптөөҕүн талар сорудаҕы толордулар, 2 турга 6 кэрдииһинэн: математика, языкознания, литература, уопсай билии, харамайдар уонна үүнээйилэр, муусука блиц-ыйытыкка эппиэттээтилэр. 3 турга бэриллибит бириэмэҕэ «Кини кимий?» биллэр-көстөр дьон хаартыскаларынан тургутук ыытылынна. Уонна 3 тур түмүгүнэн 2 элбэх баалы ылбыт бастыҥ үөрэнээччилэр Алексеева Уйгууна, Сергеева Сахая финалга тахсан күөн көрүстүлэр. Финалга 8-с б кылаас үөрэнээччитэ Сахая элбэх ыйытыкка сөптөөх хоруйу биэрэн, быйылгы үбүлүөйдээх сылга «Уһулуччу өйдөөх» ааты сүгэн, оскуола дириэктэрэ сылын аайы туруорар «Сир уустара» лааҕырга биир сезоҥҥа босхо сынньанар путевка сэртипиккэтинэн, кыайыылаах грамотатын, кинигэ бирииһи тутта. Маны таһынан былырыыҥҥы кыайыылаах 7-с кылаас үөрэнээччитэ Иванова Владиана үөрүүлээх быһыыга көһө сылдьар кубогын туттарда.
Күрэс түмүгүнэн 1 миэстэни 8-с б кылаас үөрэнээччитэ Алексеева Уйгууна, 2 миэстэни 7-с кылаас үөрэнээччитэ Кузьмин Арчын, 3 миэстэни 7-с кылаас үөрэнээччитэ Акимов Айысхан ыллылар, грамота бириис тутан үөрдүлэр. Оҕолор бары билиилэрин тургутан маннык олус туһалаах күрэхтэри тэрийэр Уйбаан Нуолур аатынан модельнай бибилэтиэкэ үлэһиттэригэр, оскуолабыт дириэктэригэрр дириҥ махталларын тириэрдэллэр.
Людмила ПАВЛОВА,
К.Е.Иванов аатынан Элгээйи орто оскуолатын бибилэтиэкэрэ, саха тылын учуутала