Түбэй нэһилиэгэр Кыайыы күнүн автопробегынан саҕалаатыбыт. Ол курдук, ыам ыйын 8 күнүгэр киэргэммит массыыналар уулуссанан айаннаатылар. Ол кэннэ кулууппутугар «Сэргэ» литературнай түмсүү чилиэннэрэ кыттыылаах инсценировка буолла. Киэһэтин Улуу Кыайыы иһин сырдык тыыннара быстыбыт, тыылга үлэ бөҕөтүн үлэлээбит сэрии кыттыылаахтарын, тыыл бэтэрээннэрин чиэстээн пааматынньыкпытыгар өйдөбүнньк чүмэчини уурар аахсыйаҕа нэһилиэкпит олохтоохторо бары кытынныбыт.
Биһиги нэһилиэкпитигэр соҕотох сэрии сылын оҕото Алексей Данилов олорор. Ыам ыйын 9 күнүгэр пааматынньык аттыгар миитин буолла. Бу күн Алексей Матвеевиһы, анал байыаннай дьайыы кыттыылаахтарын төрөппүттэрин эҕэрдэлээтибит, ону сэргэ бородуукта набора кэһии туттардылар. Ону сэргэ бу күн үлэ бэтэрээннэрэ кыайыыга анаммыт хоһооннору аахтылар. Кыайыы оһуокайыгар эргийдибит, саллаат хааһытын сиэтибит.
Оттон эбиэт кэннэ АБДь сылдьар биир дойдулаахпыт Игорь бирииһигэр «Синтай» тыраахтардар күрэстэрэ дьон болҕомтотун тарда. Ураты, сэргэх күрэскэ «Синтаайдаах» алта киһи кытынна. Кыайыылаахтар кырааматанан, анал бириистэринэн бэлиэтэннилэр.
Дарьяна ПОТАПОВА, Түбэй.