Үрүӈ түүннэр үүннүлэр !
Үтүө күннэр кэллилэр!
Киһи барыта таһырдьа!
Уонна хаһан? Сайын дии!
Самаан сайыммыт салаллар сайылык күнэ — Ньукуолун күнүн көрсө үтүө үгэскэ кубулуйбут сылын аайы ыытыллар тэрээһиммитигэр Сиэйэ нэһилиэгин Аҕам саастаахтара уйгу -быйаҥ ыһыахпыт ыһыллар ытык сиригэр «Күөх Тумулга» мунньустан сайыммытын көрүстүбүт , ирэ-хоро кэпсэтии , тириини тэнитии , ахтылҕаны аһарыныы буолла, Дьокуускай куораттан кэлбит биир дойдулаахтарбыт Сиэйэни иккис дойду оҥостубут Владимир Трофимов, бэйэбит кыыспыт Люция Яковлева дойду ахтылҕанын таһааран көхсүлэрэ кэҥээн үөрүү -көтүү үгүс .
Нэһилиэк баһылыга Александр Романов эҕэрдэ бастыҥын этэн туран дьаһалта үлэһиттэринээн кыттыһан аҕалбыт кустарын утары уунна , иһэр ууларыгар тиийэ бэрэгэйдээн , бэлэмнээн биэрдилэр .
Оллооҥҥо кус да миинэ , эт да миинэ буһан бидилийдэ , сиэри -туому тутуһан сири -уоту, аал -уот иччитин алаадьынан айах тутуу сиэрэ-туома ыытылынна .
Үөрүү -көтүү аргыстаах култуура киинин кыргыттара ырыаны тойугу хайа тардыылара ыраахха дылы дьиэрэйдэ , аҕам саастаахтарга сөптөөх көрдөөх- нардаах оонньууну ыыттылар кими да хомоппот курдук кыттыбыт бары бириис ылла
Биир киһи сөҕөрө хомурдуос курдугу халлааҥҥа көтүтэн ( квадрокоптер) үөһэттэн уһуллууну бары сөҕө-махтайа , көрдүлэр,биир туспа үөрүүнү-көтүүнү эбии үксэттэ, хаһаайына Сиэйэ нэһилиэгин тэрээһиннэрин
официальнай сайтарга сырдата турар оператор Андрей Афанасьев буолар.
Ытык кырдьаҕас 96 сааһыгар сылдьар Фекла Попова, тохтор көмүс куоластаах Марфа Архангельская буоланнар оһуокайдаан тэйдилэр .
Айылҕаҕа үүттээх чаай, кус, эт миинэ тото иһэн , дуоһуйа ирэ-хоро кэпсэтэн, эбиитин кус кэһиилэнэн илии тутуурдаах, өттүк харалаах дьиэлээтилэр .
Күммүт -дьылбыт табыллан , үөһэ- мэӈэ халлааӈӈа күммүт үҥкүүлүү дайда, кэҕэ кыылбыт куула тыаттан этэн чоргутара хас биирдии саха киһитин сүрэҕин долгутара ханна барыай…
Түгэнинэн туһанан, сылын аайы бу тэрээһини иилээн саҕалаан , суол иис боппуруоһун быһаарсар кырдьаҕастар сэбиэттэрин бэрэссэдээтэлэ Нина Максимова уонна эдэр үлэһит наар сүүрэ-түбүгүрэ сылдьар Нарыйа Васильева буолаллар .
Куруук дьону үөрдэ -көтүтэ сылдьыӈ , үлэҕитигэр ситиһиини , этэӈӈэ буолууну баҕара хаалыаҕыӈ.
Айылҕалыын алтыһыы-кэскили түстээһин !
Зоя Семенова, Сиэйэ.