Сунтаар улууһун олохтоохторо уонна ыалдьыттара!
Сунтаардааҕы ГАИ сулууспата суол быраабылатын булгуччу тутуһаргытыгар ыҥырар. Халлаан сылыйан суолга олус халтараан буолан, сатыы да, массыынанан да сылдьар дьоҥҥо олус сэрэхтэннэ. Бу кэмҥэ тимир көлө айанныыр оскуораһын көрөн, суол бары кыттыылаахтарыгар убаастабыллаах сыһыаннаһыы булгуччулааҕын санатабыт. Ону таһынан, оҕо-аймах сааскы сынньалаҥҥа баран таһырдьа сылдьара элбээтэ, кырачаан суол кыттыылаахтарын харыстыаххайыҥ, болҕомтону ууруоххайыҥ диэн ирдиибит. Муус устар 5 күнүгэр диэри «Куттала суох каникул» диэн сэрэтэр үлэ бара турар. ГАИ сотрудниктара оҕону олордон тиэйии быраабылатын көрүөхтэрэ.
Ону тэҥэ, муус устар 5 күнүгэр диэри Саха сирин үрдүнэн ГАИ инспектордара күүстээх режимҥэ киирэн күнүстэри-түүннэри үлэлииллэр. Ааспыт нэдиэлэ түмүгүнэн Сунтаар улууһугар 2 суоппар итирик туруктаах уруулга олорон суут уураҕын кэтэһэллэр, бу манна суоппар 45 тыһ.солк ыстарааптанарын таһынан, 18 ыйга, ол эбэтэр 1,6 сылга, массыына ыытар бырааба быһыллар.
ГАИ сотрудниктара сүрүн сыалбыт-сорукпут киһи олоҕун уонна доруобуйатын харыстааһын буолар. Дьон сэргэ бэйэ-бэйэҕэ убаастабыллаахтык сыһыаннастаҕына, суол быраабылатын куннээҕи ирдэбил оҥостон сырыттаҕына — куттал суох буолуо диэн эрэнэбит.
Сунтаардааҕы ГАИ сулууспата