Сунтаардааҕы технологическай колледж 2011 сылтан саҕалаан элбэх ыччаты араас идэ хайысхатыгар уһуйан кэллэ. Орто анал үөрэх кыһатын бүтэрээччилэр үгүстэрэ аныгы кэм ирдэбилигэр олус наадалаах идэлэри баһылаан, үлэ ырыынагар бэйэ миэстэтин булунан үлэлии-хамныы, айа-тута сылдьаллар.
Бүгүн ааҕааччыларбытыгар анаан үөрэххэ киирии, итиэннэ тутар хамыыһыйа үлэтин-хамнаһын туһунан сэкирэтээр Дария Трофимовалыын кэпсэтиибитин таһаарабыт.
– Дария Викторовна, үтүө күнүнэн! Быйылгы үөрэх дьылыгар эһиги колледжкытыгар ханнык идэлэргэ туттарсыахха сөбүй, итиэннэ төһө миэстэ көрүллэн турарый?
– Быйыл 9-с кылаас кэннэ туттарсыан баҕалаах оҕолору “Технология продуктов питания животного происхождения” уонна “Техническое обслуживание и ремонт автотранспортных средств”, ону тэҥэ 11-с кылаас кэнниттэн «Электромонтер по ремонту и обслуживанию электрооборудования», “Сварщик”, “Мастер по ремонту и обслуживанию автомобилей” хайысхаларынан исписэлиистэри бэлэмниибит. Манна 9-с кылаас кэнниттэн кэлэр оҕолор 3 сыл 10 ый, оттон 11-с кылаас кэннэ 10 ый иһигэр үөрэнэн, идэни баһылыыллар.
Уопсайа 115 бүддьүөт миэстэтэ көрүллэн турар. Туттарсыан баҕалаахтар докумуоннары Госуслуги портал нөҥүө эбэтэр тутар хамыыһыйаҕа бэйэлэрэ тиийэн кэлэн биэриэхтэрин сөп.
– Үөрэххэ киирэргэ ханнык докумуон ирдэнэрий?
– Бастатан туран үөрэххэ туттарсааччы тус сайыбылыанньата наада. Ону тэҥэ, пааспар, СНИЛС, медполис, орто оскуоланы бүтэрбитин туоһулуур аттестат копиялара, 4 устуука хаартыска, 86У пуормалаах медсправка, прививка сэртипикээтэ уонна ФЛГ түмүгэ ирдэнэр.
– Бүгүҥҥү күн туругунан төһө сайабылыанньа киирдэ? Атын улуустан туттарсааччылар бааллар дуо? Ордук ханнык хайысханы талар эбиттэрий?
– Атын улуустан туттарсааччылар бааллар. Ол курдук, Ньурбаттан, Үөһээ Бүлүүттэн, Кэбээйиттэн, Дьокуускайтан бааллар. Докумуоннары бэс ыйын 20 күнүттэн тутан саҕалаабыппыт. Бүгүҥҥү күн туругунан 40-тан тахса сайабылыанньа киирдэ. Ордук электрик, сварщик идэлэригэр туттарсыан баҕалаах элбэх. Ону тэҥэ «техническое обслуживание и ремонт автотранспортных средств» хайысхаҕа киирдэ.
– Докумуоннары хаһааҥҥа диэри тутаҕытый, миэстэ туолбатаҕына болдьоҕун уһатар былааннааххыт дуо?
– Былаан быһыытынан атырдьах ыйа бүтүөр диэри тутабыт, миэстэ туолбат түгэнигэр уһатан биэрэбит. Ол эрээри, урукку сылларга атырдьах ыйын бүтүүтэ тоҕо анньан кэлээччилэр. Ордук ити бириэмэҕэ туттарсыан, киириэн баҕалаах элбиир.
– Оттон, эһиги кыһаҕытыгар үөрэнэ киирбит оҕолор туох көмөнү туһаныахтарын сөбүй?
– Устудьуоннарбытыгар үөрэнэргэ табыгастаах усулуобуйа барыта баар. Ол курдук, толору хааччыллыылаах уопсай дьиэ, былырыын эрэ саҥа үлэҕэ киирбит, туох баар аныгылыы тиэхиньикэнэн хааччыллыбыт мастарыскыайдар, сылаас, иҥэмтиэлээх аһынан күҥҥэ 3-тэ аһатар остолобуой о.д.а. Маны тэҥэ, үөрэхтэригэр туйгун, үчүгэй көрдөрүүлээх үөрэнээччилэрбитигэр үрдүк истипиэндьийэ көрүллэр. Онтон да араас көмөлөр бааллар.
Елизавета ТИТОВА