Дьаархаҥҥа «Кыһын Саха сириттэн саҕаланар» бүтүн Арассыыйатааҕы бэстибээл салгыы бара турар.
Ахсынньы 1 күнүгэр ырыа-тойук аргыстаах күөх харыйабытын умаппыт буоллахпытына, бэҕэһээ Дьаархаммыт тэрилтэлэрин икки ардыларыгар бэртээхэй күрэс буолла. Күрэспитигэр «Кыһыммыт кэһиитэ — тоҥ ас быыстапката (эттэн, үүттэн тоҥ ас араастара)», «Саамай эмис эт», «Гастроужин в ресторане», «Ретро-харыйа» уонна «Былыргы аккырыыккалар быыстапкалара» дин түһүмэхтэр киирдилэр.
Олохтоохтор араас ас эгэлгэтин остуол хотойорунан тардыбыттар. Муус иһит кытта оҥоро,н эмис сылгы этэ, тоҥмут күөрчэх, өрүһэ да суох буолларбыт кыһыллар балык арааһын аҕалбыттар. Ампаардарын хаһан, сундууктарын хостоон 60-70 сыллардааҕы дьуолка оонньуурдарын, кичэллэн харыллыбыт Моруос оҕонньор сиэнинээн Хаарчааналыын, аан бастакы гирлянда, сулус уонна аҕа саастаахтарбыт оҕо сылдьан баатанан, кумааҕынан оҥорбут оонньуурдарын аҕалан харыйаларын симээбиттэрэ олус үчүгэйдик көһүннэ, киһи дууһатын таарыйда. Киэргэммит харыйаларын аттыгар Сэбиэскэй саҕанааҕы аккырыыккалары кэчигирэччи уурбуттар. Аккырыыккалары ылан аахтахха истиҥ сыһыан, таптал, ахтылҕан ис дууһаттан суруллубут суруктар сылаас тыыннара кэлэн ааһарга дылы буолла.
Дьүүллүүр сүбэ быыстапканы көрөн бүтэн аны «рестораҥҥа» аһаатылар. Синньигэс бииллэрин маҥан фартугунан быакаччы бааммыт кыргыттар шеф-повардар астаабыт астарын аналлаах остуолга таспытынан бардылар. Манна бааллар этэ ГОСТ ирдэбилигэр эппиэттиир ССРС саҕанааҕы бастыҥ ас, төрүт сандалыбыт аныгылыы тыыннаммыт менюта уонна Саҥа дьыллааҕы таптаһар сүрэхтэр остуоллара.
Күрэс буолан баран түмүктээх, ол курдук 1 миэстэ уһуйаан (сал. Анна Андреева), 2 м. дьаһалта уонна кыра тэрилтэлэр хамаандалара (сал. Петр Тимофеев), 3 м. оскуола үлэһиттэрэ (сал. Станислав Кычкин) буоллулар. Миэстэлэспит хамаандаларга ИП «Васильев В.В.» сыаналаах бириистэри туруорда.
Маннык күрэхтэр тэрилтэ үлэһиттэрин түмэр, туһалаах сынньалаҥы бэлэхтиир.
Анна МАРКОВА, Дьаархан