Сылын ахсын баччаларга Сунтаар нэһилиэгэр сүүһүнэн арассаада, дьэрэкээн сибэкки атыыга хото тахсар. Ол курдук идэтийбит оҕуруоччуттар күөх үүнээйи арааһын эрдэттэн олордон, оҕолуу бүөбэйдээн үгэскэ кубулуйбут дьаарбаҥкаҕа кытталлар.
Дьаарбаҥка киэҥ түһүлгэтигэр дьон кэлиитэ көхтөөх, ким сибэкки, ким оҕуруот аһын наадыйарынан бэлэм арассааданы атыылаһан үөрүүлэрэ үгүс.
Альбина Иванова сылын аайы маннык дьаарбаҥка буолара олус кэрэхсэбиллээҕин бэлиэтии көрөр. Кини дьиэтигэр оҕурсууну, помидору бэйэтэ үүннэрэр буолан бу сырыыга астра сибэкки ыллым диэн кэпсиир.
Альбина Иванова: «Дьиэҕэ кыайан үүннэрбэт эбэтэр үүннэрэн баран арассаадалара сатамматах дьоҥҥо олус туһалаах дьаарбаҥка. Көрүөхтэн кэрэ сибэкки арааһа баар, бэйэбэр астра ыллым. Кэлин ити өйдөөн көрбүтүм, улахан иһиккэ олус үчүгэй петуниялары арассаадалаан атыылыылларын аһара сэргээтим».
Кэмпэндээйиттэн киирэ сылдьар уопуттаах оҕуруоччут Наталья Егорова дьаарбаҥкаҕа сылын аайы көтүппэккэ кыттар. Арай, суол хаайан бу иннигэр тэриллибит бастакы дьаарбаҥкаҕа кыайан киирбэтэҕим диэн хомойо саныыр. Кини дьиэ сибэккититтэн саҕалаан арассаада араас көрүҥүн анаан-минээн атыыга таһаарар.
Наталья Егорова: «Быйыл низкорослай помидору, минньигэс биэрэһи, сибэкки арааһын хото ыллылар».
Биллэн турар, хас биирдии үүнээйи үчүгэй көрүүнү-харайыыны эрэйэр. Онон хара маҥнайгыттан оҕолуу бүөбэйдэммит, элбэх сыраны ылбыт үүнээйилэр сөп сыанаҕа атыыланнылар. Холобура, сибэкки арассаадата көрүҥүттэн көрөн ортотунан 300-1000 солк. Оҕуруот аһа суортарыттан көрөн 100 солк. саҕаланаллар.
Елизавета ТИТОВА