Хас биирдии көлүөнэҕэ холобур оҥостор дьоммут, дьоруойдарбыт бааллар.
Сунтаардааҕы политехническай лиссиэй-интэринээт 10-с кылааһын үөрэнээччитэ Дьулустаан Павлов Аҕа дойду улуу сэрии ыар кэмнэрин, эрэйин этинэн-хаанынан билбит хос эбэтин Акулина Иннокентьевна Степанованы бэйэтин дьоруойунан ааҕар. Дьулустааҥҥа хос эбээтэ сэрии саҕана элбэх эрэйи, кыһалҕаны көрбүт хорсун санаалаах, ыарахантан чаҕыйбат киһи холобура буолар. Ол ыар кэмҥэ 19 эрэ саастаах кыысчаан бэйэтин санаатын, сэрии содулун, ыарахан олоҕу кырачаан блокнот-күннүккэ тиһэн испит. Эдэркээн кыысчаан ол кэминээҕи олоҕу сурукка тиспит күннүгүн суолтата ордук кэм-кэрдии ааспытын кэннэ өссө улаатар.
Элбэх дьон ол саҕанааҕы эдэр киһи санаатын, толкуйун, дьылҕатын, сэрии ыар сылларын биллиннэр диэн Дьулустаан эбэтин күннүгүнэн научнай-практическай кэмпириэнсийэҕэ кыттар.
Маннык холобур дьоҥҥо ордук тиийимтиэ буоларын өйдүүр. Кини бэйэтин саастыы оҕолорго Аҕа дойду сэриитин туһунан өйдөбүлү, эйэлээх олох туохха да тэҥнэммэт күндүтүн тириэрдэр баҕа санаалаах. Онон Акулина Иннокентьевна күннүгэ кэлэр кэнчээри ыччакка суолтата туохха да тэҥнэммэт күндү буолар.
Ира АФАНАСЬЕВА- СПТЛ 11 кылааһын үөрэнээччитэ