Балаҕан ыйын 23 күнүгэр сырдатар литературнай дьыктаан аахсыйа быһыытынан улуус үгүс бибилэтиэкэлэригэр ыытылынна.
Билиилэрин-көрүүлэрин бэрэбиэркэлиэхтэрин баҕалаахтар Кэмпэндээйи бибилэтиэкэтигэр кэлэн эмиэ бу аахсыйаҕа кыттыстылар. Бу аахсыйа аан бастаан Мурманскайдааҕы судаарыстыбаннай библиотека тэрийиитинэн 2021 сыллаахха ыытыллыбыта. Дьыктаан кыттыылаахтара литератураҕа сыһыаннаах 20 ыйытыкка сөптөөх эппиэти талыахтаахтар. Мантан 3 ыйытыкка бэйэҥ дойдугар сыһыаннааҕы эбэн биэриэххэ сөп. Онон бастакы ыйытыкка «Нуучча революционер суруйааччыта Н. Г. Чернышевскай ханнык куоракка сыылкаҕа кэлбитэй», иккис ыйытыкка «Биллиилээх нуучча суруйааччыта И. А. Гончаров хайа айымньытыгар Саха сирин туһунан суруйбутай», оттон үһүс ыйытыкка «Кэмпэндээйини чинчийбит дьоннортон хайалара литературанан дьарыктанар этэй»диэн эбэн биэрдибит. 60 мүнүүтэ устата толоруллуохтаах дьыктааны сорохтор эрдэ түмүктээтилэр, сорохтор урут үөрэппиттэрин санаан, толкуйдаан балайда олордулар. Бары кыттыбыт 14 киһи, олор истэригэр 2 оскуола үөрэнээччитэ, аахсыйаҕа кыттыыны ылбыттарын туһунан туоһу суруктары туттулар. Түмүккэ, бу аахсыйа муҥутуур кыайыылааҕынан оскуола алын сүһүөх учуутала Ираида Чолбодукова, туйгуннарынан учууталлар Нарыйа Кондратьева, Валентина Федорова, олохтоох дьаһалта экэнэмииһэ Розалия Тихонова буоллулар. Оскуола үөрэнээччилэрэ Сардаана Макарова, Сайаан Саввинов үчүгэй түмүгү ситиспиттэрэ үөртэ. Бу аахсыйаҕа эһиил өссө элбэх киһи кыттыа диэн эрэллээхпин, ааҕар киһи билиилээх, билиилээх киһи сайдыылаах, сайдыылаах киһи кыахтаах диэн мээнэҕэ эппэттэр.
Татьяна МЕСТНИКОВА.