Сунтаар улууһун үөрэҕин управлениетын “Книжный таймер” уус-уран литератураны ааҕыы библиотечнай марафон бырайыага бары үөрэх тэрилтэлэригэр хас чэппиэр аайы ыытыллар.
А.А.Иванов-Күндэ аатынан Кутана орто оскуолатыгар ааҕыы марафонун үөрэнээччилэргэ интэриэһинэйдик, сэргэхтик тэрийэллэр.
Педагог-бибилэтиэкэр Изабелла Третьякова саха тылын уһулуччулаах маастара, суруйааччы Н.Е.Мординов-Амма Аччыгыйа төрөөбүтэ 120 сылыгар, кини айар үлэтигэр аналлаах сахалыы ааҕыыга бырайыагын дьүөрэлии саҕалаан үлэлэттэ. Аан бастаан 7-с кылаас үөрэнээччилэрэ суруйааччы кэпсээннэрин аахтылар, санааларын атастастылар, ыйытыыларга хоруйдаатылар.
Саха АССР үтүөлээх учуутала, СӨ Учууталлар учууталлара, Владимировскай уобалас Гусь-Хрустальнай куоратыттан төрүттээх, 33 сыл устата Кутана орто оскуолатыгар завучтаабыт уонна нуучча тылын, литературатын умсугутуулаахтык үөрэппит учууталбыт Панфилова Фаина Владимировна 80 сааһыгар аналлаах “Уроки добра Панфиловой Ф.В” диэн литературнай ааҕыылар үрдүк таһымнаахтык ыытылыннылар. Учууталбыт таптыыр поэтын Сергей Есенин хоһооннорун 7-11-с кылаастар үөрэнээччилэрэ аахтылар. Сергей Есенин төрөөбүтэ 130 сылыгар анаан поэт лирикатын уонна олоҕун туһунан библиотечнай бэсиэдэ ыытылынна. Ааҕыыга 5-с кылаас үөрэнээччилэрэ Антуан де Сент-Экзюпери “Маленький принц” айымньытын аахтылар, презентация көрдүлэр.
Элбэх кинигэни аахпыт үөрэнээччигэ үөрэх сылын түмүгүнэн оскуола бибилэтиэкэтин “Бастыҥ ааҕааччы” диэн анал аат иҥэриллэр үтүө үгэстээхпит. Бастыҥ ааҕааччыга оскуола дириэктэрэ Владимир Архипов сылын аайы бэйэтин бириэмийэтин туттарар.
Анастасия АЛЕКСАНДРОВА, Кутана