Олунньу 20 күнүгэр Хочо уонна Бордоҥ кустатын бэтэрээннэрин X улуустааҕы аҕам саастаахтар спартакиадаларын күрэхтэһиилэрэ Кириэстээх нэһилиэгэр үрдүк таһымҥа буолан ааста.
Уопсайа 8 хамаанда кытынна. Куокуну, Кириэстээх, Бүлүүчээн уонна Наахара холбоһуктаах хамаандалара, Тойбохой уонна Аллыҥа холбоһуктаах хамаандалара, Бордоҥ уонна Тэҥкэ холбоһуктаах хамаандалара, Дьаархан уонна Маар Күөл холбоһуктаах хамаандалара, Арыылаах хамаандата, Хадан, Илимниир уонна Туойдаах холбоһуктаах хамаандалара. Куокуну нэһилиэгин 21 аҕам саастаахтара спорт 12 көрүҥэр ситиһиилээхтик кыттан хамаанданан 5 миэстэни ылары ситистилэр. Ол курдук буулдьанан ытыыга 1 миэстэ, волейболга 2 миэстэ, остуол оонньууларыгар 2 миэстэ, ох саанан ытыыга 2 миэстэ, бильярд оонньуутугар 3 миэстэ. Күрэхтэһии түмүгүнэн кыттааччыларбыт биирдиилээн миэстэлэстилэр: буулдьанан ытыыга эр дьоҥҥо 1 миэстэ — Руслан Николаев, оҕунан ытыыга 2 миэстэ — Аркадий Яковлев, городки 2 миэстэ — Тамара Степанова, дуобат 2 миэстэ — Людмила Степанова, остуол оонньуулара 2 миэстэ — Александр Петров , городки 3 миэстэ — Виссарион Хадаев. Сыл аайы ыытыллар аҕам саастаахтар күрэхтэригэр куокунулар өрүү кытталлар.
Ангелига Генерова,
уопсастыбаннай кэрэспэдьиэн.