XXVI төгүлүн ыытыллар быйылгы «Аҕа күрэҕэ-2026″ тэрээһин ытык-мааны Таатта улууһун Чөркөөх нэһилиэгэр буолан ааста.
Күрэскэ барыта 11 улуустан бэйэлэрин улуустарыгар сүүмэрдиир күрэскэ кыайбыт 13 аҕа уолунаан хамаанда буолан кытыннылар. Сунтаартан улуус сүүмэрдиир күрэһин кыайыылаахтара Сиэйэ нэһилиэгиттэн Степан Николаевич уонна уола Гром Корниловтар кытыннылар. Кинилэр улууска үһүс сылын кыайыылаах буолан, улууспут аатын өрөспүүбүлүкэҕэ эмиэ үһүс төгүлүн көмүскээтилэр.
Улахан дьиэ кэргэн аҕа баһылыга Степан Николаевич Сиэйэ баһаарынай чааһыгар суоппарынан үлэлиир, улахан кэтэх хаһаайыстыбаҕа сылгы, ынах иитэр, аҕыс ого амарах аҕата, кинилэргэ мэлдьи үтүө холобур буолар. Гром ыал улахан оҕото, Сиэйэ орто оскуолатын 11-с кылааһыгар ситиһиилээхтик үөрэнэр, бастыҥ спортсмен, дьонугар улахан көмө киһитэ.
Икки күннээх күрэс олус тыҥааһыннаах, эрийсиилээх буолла. Ол курдук, биһиги уолаттарбыт үс олус уустук, улахан сыраны эрэйэр көрүҥнэргэ — бэрэбинэ эрбээһинигэр уонна мас хайытан саһаанныырга бастакы миэстэлэри, бэрэбинэ сулуйуутугар үһүс миэстэни ылан, уопсай түмүккэ 13 хамаандаттан lV миэстэни ыллылар.
Корниловтар дьиэ кэргэттэригэр Сунтаарбыт улууһун чиэьин көмүскээн, өрөспүүбүлүкэ күрэһигэр үһүс төгүлүн кыттыбыттарыгар эҕэрдэлээн туран, улуус баһылыгын Анатолий Григорьев Махтал суругун уонна сыаналаах бэлэҕин улуустааҕы Аҕа сүбэтин салайааччыта буоларым быһыытынан туттардым.
Күрэс түмүгүнэн муҥутуур кыайыылаах үрдүк аатын Амма улууһуттан Николай Иннокентьевич уонна Айсен Алексеевтар хамаандалара ылла, ll миэстэни Мэҥэ-Ханаластан Андрей Гаврильевич, Максим Пивоваровтар, lll миэстэни Чурапчыттан Сергей Эдуардович, Саян Крыловтар ыллылар.
Кинилэр СӨ Үлэ уонна социальнай сайдыы министиэристибэтэ туруорбут 300, 150, 100 тыһ. солк. суумалаах сэртипикээттэринэн, анал бириистэринэн уонна мэтээллэринэн наҕараадаланнылар.
Эһиилги XXVII «Аҕа күрэҕэ» кыайыылаахтар Николай, Айсен Алексеевтар дойдуларыгар Амма улууһун Чакыр нэһилиэгэр ыытыллара быһаарылынна.
Борис УЛАРОВ, улуустааҕы Аҕа сүбэтин салайааччыта
Хаартыскалары ааптар тиксэрдэ