Аан дойдутааҕы түмэл күнүн көрсө Сунтаар коллекционердарын быыстапката С.А.Зверев-Кыыл Уолун аатынан холбоһуктаах түмэлгэ буолан ааста. Дьикти дьарыктаахтар быйылгы көрсүһүүлэрин Улуу Кыайыы 80 уонна С.А.Зверев-Кыыл Уолун 125 сылыгар анаатылар.
Лидия, Александр Архиповтар дьиэ кэргэнинэн арааһы хомуйаллар. Ордук харчыны сөбүлээн муһаллар эбит. 
Ыал аҕа баһылыга Александр араас дойдулар банкноталарын коллекциятын киһи эрэ сөҕө, хайгыы, кэрэхсии көрөр. Кэлиҥи коллекциятыгар Донецкай народнай республика дьоруойдара мэтириэтэ ойуулаах сэдэх банкноталар киирбиттэр.
Ону тэҥэ, ыаллар коллекцияларыгар 1769 с. манньыата харчы баарын көрдөрдүлэр. Коллекционердар көрдөрөрү сэргэ, хас биирдии малларын туһунан киһи эрэ сэргээн истэ туруох интэриэһинэйдик кэпсииллэр.
Коллекционердар кэккэлэрин Сунтаар улууһун култууратын уонна айылгытын салалтатын салайааччыта Саргылаана Омукова хаҥатта.
Кини аҕыйах сылтан бэттэх ат быһыылаах статуэткалары муһар буолбут: » Аҕам сылгыһыт буолан оҕо сааспыттан айылҕа маанылаах кыылын — Дьөһөгөйү кытта чугастык алтыһан улааппытым. Ол иһин да буолуо, бүгэ сылдьыбыт санаабын чугас дьонум таба таайан ыраах, чугас дойдулартан миэхэ кэһии, бэлэх быһыытынан ат статуэткаларын аҕалар буолбуттара. Күннэтэ коллекциям ахсаана элбии турар».
Коллекционердар кэккэлэригэр биллэр Дмитрий Иванов араас элбэх, баай ис хоһоонноох малы-салы өссө 1980 с. муһар. Бу сырыыга былыргы мааркалары, сэрии кэминээҕи карикатуралары аҕалбытын көрдүбүт. 
Ордук, коллекционер аҕыйах ахсаанынан тахсыбыт Дьокуускай үлэ килбиэннээх куората буолбутун туоһулуур почта мааркатынан уонна кэнбиэринэн киэн туттарын эттэ. Сотору кэминэн бу булумньута туохха да тэҥнэспэт сыаналаах малынан буолуоҕа диэн этэр.
Коллекционердар быыстапкаларын кырачаан Айсан Афанасьев олус интэриэстээхтик көрдө.
Киниэхэ анаан коллекционердар үгэстэринэн «муһар кут» сыһыннын диэн бэйэлэрин баайдарыттан бэлэхтээтилэр.
Мира АФАНАСЬЕВА