Туус Кэнэлигэ «Сайдыы» култуура киинигэр 2026 сылга биллэриллибит Арассыыйа норуоттарын сомоҕолоһууларын, Саха сиригэр Култуура, Сунтаар улууһугар Сайдыы уонна Номох сылларын үөрүүлээх аһыллыытын тэрээһинэ буолан ааста. Бастакы түһүмэххэ Анна Тотонова, Евгения Эверстова тойугунан айхаллаан көрүстүлэр, 9 мэҥэ хамсаныыны оҥортордулар.
Салгыы нэһилиэк баһылыга Александр Игнатьев мустубут дьоҥҥо эҕэрдэтин тириэртэ, ааспыт сыл түмүктэринэн Сэргэй Сибиэрэп, Кыайыы 80 сылыгар анаммыт араас наҕараадалары туттартаата. Кэмпэндээйи нэһилиэгин Бочуоттаах олохтооҕун аатын «Сунтар Цеолит» тэрилтэ салайааччытыгар Петр Поповка нэһилиэк сайдыытыгар, олоҕор-дьаһаҕар өрүү күүс-көмө буоларыгар махтанан туран туттарда. Петр Михайлович эһэлэрэ Кэмпэндээйи сайдыытыгар эмиэ бэйэлэрин кылааттарын киллэрбиттэрин ахтан аһарда. Ааспыт үйэ 30-с сылларыгар Макар Никифорович Попов (Берлин Макар) Александра Овчинникова салалтатынан суол тутуутугар үлэлээбитэ. Ийэтинэн эһэтэ Петр Павлович Коротов сэрии кэнниттэн үлэлээбэккэ турбут куруорду арыйан салайбыта.
Олохтоох бибилэтиэкэ «БилииБиб» лекторийа «Кэмпэндээйи нэһилиэгэ XX үйэҕэ сайдыыта» диэн ааттаан саҥа көстүбүт бэрт сэдэх хаартыскалардаах, архыып докумуоннардаах лиэксийэни аахта уонна ааспыт үйэ саҥатыгар бэчээттэммит кинигэлэрдээх быыстапканы көрдөрдө.
Үөрүүлээх күн биир дьоро тэрээһининэн «Сайдыы» культуура киинин үлэһиттэрэ бэлэмнээбит «Күнтэн күүс ылан» эҕэрдэ кэнсиэрин бэрт сэргээн, ытыс хабыллыар диэри таһынан көрдүбүт. Кэнсиэри Лира Герасимова салайан ыытта. Үрдүк сыанаҕа кэрэ куоластаах Анна Тотонова-Күн Күөрэгэйэ, элбэх ырыа күрэһин кыайыылааҕа Аркадий Игнатьев, талааннаах ырыаһыт Николай Эверстов уоттаах-күөстээх ырыалара, Лена Борисова, «Бэс Чагда» бөлөх чаҕылхай үҥкүүлэрэ утуу-субуу көстөн бириэмэни билбэккэ да хааллыбыт. Дьоро киэһэ Анна Тотонова-Күн Күөрэгэйэ биир киэҥник биллэр «Дьол» диэн ырыатынан түмүктэннэ.
Ньурба Маалыкайыттан санаторийга эмтэнэ кэлбит учууталлар ааттарыттан Розалина Кириллина кэрэ дойдуга Кэмпэндээйигэ кэлэн олус бэркэ сынньанан, эмтэнэн баран эрэллэрин бэлиэтээн туран, санаторий кэллэктиибигэр, мусуой, бибилэтиэкэ, кулууп үлэһиттэригэр барҕа махталын тириэртэ. «Тэлэсиибэргэ эрэ көрөр сөбүлүүр ырыаһыппытын Анна Тотонованы тутан олорон көрөн астынныбыт. Дьол диэн түгэн, маннык мааны дьоннордоох, Аркадий Игнатьев курдук ырыаһыт оҕолордоох нэһилиэк эстиэ суоҕа» — диэн санаатын эттэ.
Татьяна МЕСТНИКОВА, бибилэтиэкэр
Барыылаах Бадыана хаартыскалара