Дойдубут Бэрэсидьиэнэ Владимир Путин көҕүлээбит национальнай бырайыактарынан биһиги улууспутугар дьон олоҕо тупсарыгар, үлэтэ-хамнаһа таһаарыылаах буоларыгар, улуус сайдыытыгар үгүс үтүмэн үлэ барар. Олортон «Олорор дьиэ уонна куорат эйгэтэ» национальнай бырайыак чэрчитинэн Биир ньыгыл Арассыыйа «Хаарбах дьиэттэн дьону көһөрүү» Норуот бырагырааматынан улууспутугар биэс сыл иһигэр 14 элбэх кыбартыыралаах дьиэ тутулунна. Бу уопсай иэнэ – 24439,22 кв. м. Бу саҥа тутуллубут дьиэлэргэ 1000 кэриҥэ дьон көстө.
Холобур, ааспыт сыл сайыныгар Сунтаар сэлиэнньэтин хабайар хаба ортотугар биэс мэндиэмэннээх дьиэ тутуута бүтэн, 86 ыал саҥа дьиэҕэ көспүтэ. Бу дьиэ тутуутугар «Главстройкомплекс» тутуу тэрилтэтэ үлэлээбитэ. Саҥа дьиэ олохтоохторо быйылгы кыстыгы (хаһааҥҥытааҕар да тымныы кыһыны) этэҥҥэ туораатыбыт, дьиэбит сылаас диэн кэпсэтэллэрин үгүстүк иһиттим.
Бу дьиэҕэ олорор Мария Егорова санаатын маннык үллэһиннэ:
— Дойду Бэрэсидьиэнэ көҕүлээбит «Олорор дьиэ уонна куорат эйгэтэ» национальнай бырайыак чэрчитинэн мин урукку өттүгэр олорбут дьиэбиттэн көһөр уочаратым кэлэн, бу саҥа дьиэбит тутулларын кэтэспитим аҕай. Урукку дьиэм бириэмэ-кэм кэрдиитинэн эргэрэн, кэлиҥҥи сылларга олус тымныйар буолбута. Ааспыт сайын күүтүүлээх саҥа кыбартыырабар оҕолорбунаан, сиэннэрбинээн көһөн киирбиппит. Кыстыкпытын сылаастык туораатыбыт. Барыта эриэ-дэхси буолбатах эт, бастаан киирэрбитигэр. Ол эрээри кыра итэҕэстэри-быһаҕастары тутааччыларга эттэхпитинэ туоратан истилэр. Билигин да үлэ барар.
Онон мин дойдубутугар үлэлиир Норуот бырагыраамата дьон туһугар кыһанарын, үлэлиирин сэргиибин. Биир ньыгыл Арассыыйа Норуот бырагырааматын олоххо киллэрэн, бу биэс сылга биһиги улууспутугар элбэх хайысхаҕа үлэ бөҕө барбыта киһи хараҕар быраҕыллар, улууспут тупсар, дьон олорор, сынньанар усулуобуйата тэриллэр.
Мария Федорова, биэнсийэлээх:
— Хаарбах дьиэттэн дьону көһөрүү бырагырааматыгар хапсаммын, мин эргэ икки этээстээх дьиэттэн сүрдээх үчүгэй оҥоһуулаах саҥа дьиэҕэ көспүтүм. Бу олорор дьиэбит күлүүһүн ааспыт сайын улууһум баһылыга Анатолий Григорьев илиититтэн туппутум үөрүүбүн өссө үөрдэппитэ. Тутатына кыбартыырабын сууйан-сотон киирбитим. Үөрүүбүн үллэстэн, дьоммун-сэргэбин, доҕотторбун ыҥыран ыалдьыттаппытым. «Хаарбах дьиэттэн дьону көһөрүү» Норуот бырагырааматыгар хапсыбатах эбэтэр чааһынай дьиэлээх доҕотторум олус ымсыырбыттара, олох куоракка олорор курдук эмээхсин буоллуҥ. Дьиэҥ сүрүнэ сылаас буоллун диэн алгыс тылларын эппиттэрэ. Бу кырдьар сааспар сылаас, толору хааччыллыылаах дьиэҕэ олорор буолбуппуттан олус үөрэбин. Ону сэргэ дойдубут Бэрэсидьиэнэ Владимир Путин көҕүлээбит «Олорор дьиэ уонна куорат эйгэтэ» национальнай бырайыага дьону дьиэлииргэ-уоттуурга туһуланан үлэлиирэ олус үчүгэй. Улууспутугар Норуот бырагырааматынан элбэх дьиэ тутуллан, сэлиэнньэбит көстүүтэ да, дьон олоҕо да тубуста диэн көрөбүн мин. Салгыы дьон туһугар үлэлиир бырагыраама кэҥээтин.
Хаарбах туруктаах дьиэлэртэн көһөрүү бырагыраамата 2019 сылтан «Дьиэ-уот уонна куорат эйгэтэ» национальнай бырайыак чэрчитинэн олоххо киирэн үлэлээтэ. Салгыы 2025 сылтан «Олох инфраструктурата» диэн саҥа национальнай бырайыагынан салҕанан барар. 2025-2030 сс. дойду үрдүнэн 345 000 киһи хаарбах дьиэлэртэн көһөрүллүөхтээхтэр.
Яина ВЛАСЬЕВА