Учуутал идэтин талан ылбыт дьон үүнэр көлүөнэни үөрэтиигэ-иитиигэ тутаах дьон буолаллар. Быйыл улууска 26 саҥа исписэлиис үлэтин саҕалаата. Сунтаар улууһугар эдэр учууталлары кытары үлэ чэрчитинэн алтынньы 30 күнүгэр А.П.Павлов аатынан Сунтаар 1 №-дээх орто оскуолатыгар педагогическай кылаастар үөрэнээччилэригэр уонна Сунтаар нэһилиэгин оскуолаларын эдэр учууталларыгар аналлаах «Дьоһуннааҕы кэпсэтии. Учуутал идэтин туһунан» тэрээһин үрдүк таһымнаахтык ыытылынна. Тэрээһини А.П.Павлов аатынан Сунтаар 1 №-дээх орто оскуолаҕа иитии үлэтигэр дириэктэри солбуйааччы Дмитрий Михайлов салайан ыытта.
РФ үөрэҕириитин бочуоттаах үлэһитэ, СР үөрэҕириитин туйгуна, педагогическай үлэ бэтэрээнэ, педагог-настаабынньык Людмила Игнатьева учуутал идэтин тула истиҥ дьоһуннаах кэпсэтиини ыытта. Кини бэйэтин педагогическай уонна уопсастыбаннай үлэтин туһунан билиһиннэрдэ. Оҕо саас, оскуола, университет, учуутал үлэтин, уопсастыбаннай үлэ кэмнэриттэн кэпсээтэ уонна туһалаах сүбэлэри-амалары биэрдэ. Эдэр учуутал бастакы уруогун ыытарыттан саҕалаан дьыалабыай таҥнар таҥаһын, идэтин таһымын үрдэтиитигэр, үөрэнээччилэри үөрэтиигэ-иитиигэ, ону таһынан уопсастыбаннай үлэҕэ диэри интэриэһинэй сүбэлэри биэрдэ.
Тэрээһиҥҥэ педагогическай үлэ бэтэрээннэрэ, А.П.Павлов аатынан Сунтаар 1 №-дээх орто оскуолатыгар дириэктэринэн үлэлээбит Николай Лидочен, Борис Герасимов; Людмила Ивановна үөрэппит үөрэнээччилэрэ: «Сунтарцеолит» тэрилтэ генеральнай дириэктэрэ Петр Попов, предприниматель Марфа Павлова уонна бииргэ алтыһан үлэлээбит кэллиэгэлэрэ кытыннылар.
Дириэктэр Афанасий Матвеев Людмила Ивановнаҕа элбэх сыл оҕону үөрэтиигэ-иитиигэ таһаарыылаахтык үлэлээбит А.П.Павлов аатынан Сунтаар №1 орто оскуолатын кэлэктиибин аатыттан Бочуотунай грамотаны уонна Сунтаар нэһилиэгин дьаһалтатын аатыттан «За вклад в развитие Сунтарского наслега» бочуоттаах бэлиэни туттарда. Үүнэр көлүөнэни үөрэтиигэ-иитиигэ өр сыллаах бэриниилээх үлэтин, улуус педагогтарыгар, үөрэнээччилэригэр аналлаах тэрээһиннэргэ актыыбынай кыттыытын иһин Сунтаар улууһун үөрэҕин салаатын аатыттан Бочуотунай грамотаны каадыры хааччыйыы отделын кылаабынай исписэлииһэ Александра Павлова туттарда.
Маннык хабааннаах тэрээһиннэр эдэр учууталларга уонна педагогическай кылаастар үөрэнээччилэригэр ыытыллаллара олус наадалаахтар. Людмила Ивановна курдук педагогическай үлэ бэтэрээннэрэ саҥа үлэлээн эрэр эдэр учууталларга настаабынньык буоланнар, кинилэргэ саҕалаабыт педагогическай үлэлэригэр айымньылаах аартыгы арыйаллар уонна күүс-көмө буолаллара үтүө түмүктэрдээх бигэ тирэҕи үөскэтэллэр.
Александра ПАВЛОВА (Николаева)