Саха сирин быыһыыр сулууспатыгар, атырдьах ыйын 28 күнүгэр, 1959 сыл төрүөх Сунтаар оройуонун Наахара нэһилиэгин олохтооҕо сүппүтүн туһунан иһитиннэрии киирбит. Бу туһунан Саха сирин быыһыыр сулууспата иһитиннэрэр.
Наахара нэһилиэгин дьаһалтатын үлэһиттэрэ этэллэринэн, эр киһи дьиэттэн өссө, атырдьах ыйын 19 күнүгэр тахсан барбыт уонна онтон ыла кинини ким да көрбөтөх. Сүппүт эр киһи аймахтарын уонна аттынааҕы ыалларын кытары кэпсэппэт буолан, кинини көрдүүргэ балаһыанньа уустугурар.
Сунтаардааҕы быыһыыр сулууспа начальнига Артем Яковлев волонтер-дронщигы кытта бэҕэһээ Наахараҕа тахсыбыттар.
“Бүгүн сарсыардаттан чугастааҕы күөллэри, үрэхтэри дронунан эргийдибит да, сүппүт киһи суолун булбатыбыт. Билигин дьону хомуйа сылдьабыт, көрдөөһүҥҥэ биһигини кытта эбии уон олохтоох киһи сылдьыһыаҕа. Үс бөлөххө арахсан, чугастааҕы сири кэрийэн саҕалыахпыт. Ол иннигэр бастаан сүппүт киһи дьиэтин көрүөхпүт. Кимниин да алтыспатах киһи буолан, ханна, хайа диэки, туох санаалаах тахсан барбытын билбэккэбит эрэ көрдүүбүт», — диэн Артем Яковлев көрдүүр үлэ хаамыытын кэпсиир.
«Сунтаар сонуннара» эрэдээксийэ
(хаартыска Быыһыыр сулууспа)