Төрөөбүт дойдутунан киэн туттар, дойдуга бэриниилээх, чөл өйдөөх-санаалаах ыччаты иитэн таһаарыы урут да баар этэ. Оттон, билиҥҥи уустук кэмҥэ ити суолтата өссө улаатан, күүһүрэн уһуйааннарга, оскуолаларга араас хабааннаах тэрээһиннэр тиһигин быспакка ыытыллаллар.
Бүгүн А.П. Павлов аатынан Сунтаар 1-кы №-дээх оскуолатын улахан кылаас үөрэнээччилэрэ анал байыаннай дьайыы кыттыылаахтарын кытта көрүстүлэр. Көрсүһүүнү Сунтаардааҕы Аҕа сүбэтин бэрэссэдээтэлэ Борис Уларов иилээн-саҕалаан ыытта. Кинини кытта анал байыаннай дьайыы кыттыылаахтара, улуустааҕы биир кэлим диспетчерскэй сулууспа салайааччыта Евгений Данилов, көрдүүр-быыһыыр сулууспа иниспиэктэрэ Марк Потапов уонна соторутааҕыта дойдутугар эргиллэн кэлбит Айаал Лазарев кыттыыны ыллылар, оҕолорго олус туһалаах кэпсэтиини оҥордулар. Хомойуох иһин, Марк Потапов бииргэ төрөөбүт быраата дойду чиэһин хорсуннук көмүскүү сылдьан сырдык тыына быстыбытын уонна убайа, быраата билигин да анал байыаннай дьайыыга дойдуларын көмүскүү сылдьалларын эттэ. Онон, биир дьиэ кэргэнтэн түөрт бииргэ төрөөбүт убайдыы-быраат дойдуга бэриниилээх буоларга иитиллэн тахсыбыттара, кинилэр хорсун быһыылара ыччакка холобур эрэ буолар. Оттон Айаал Лазарев былырыын бэйэ баҕа өттүнэн «Боотур» этэрээт кэккэтигэр киирэн сулууспатын этэҥҥэ түмүктээн кэлбитин эттэ.
Елизавета ТИТОВА