«Харысхал» түмсүүгэ үлэ күн аайы тигинэччи барар. Ким харыстыыр сиэккэ өрөр, ким иистэнэр, ким баһыылка оҥорор. Манна сылдьааччылар бары тустаах үлэлээхтэр. Онон балаҕаҥҥа биир да киһи таах олорбот. Бу барыта анал байыаннай дьайыыга сылдьааччы биир дойдулаахтарбытыгар анаммыт үлэлэр.
Кинилэргэ көмөлөһө кэлээччи ахсаана күн аайы элбиир, эбиллэр. Холобур, билигин уоппускаттан үлэлэригэр киирбит, каникуллара түмүктэнэн үөрэхтэрин саҕалаан эрээччилэр биир дойдулаах байыастарбытыгар тугу эрэ көмөлөспүт киһи диэн санааттан балаҕаҥҥа кэлэ тураллар. Сорохтор «уолаттарбытыгар маны ыытаарыҥ» диэн дьиэлэриттэн эмп-томп, таҥас-сап, ас-үөл уо.д.а. аҕалан биэрэллэр.
Ааспыт өттүгэр Белоруссияттан сылдьар атыыһыттар баҕа өттүлэринэн үбүнэн көмөлөспүт буоллахтарына, бу сырыыга, биэдэрэнэн мүөт, араас чэй, минньигэс биэрбиттэр. Ону үтүө көмөһүттэр байыастарга ыытаары кыра былаастык бытыылкаларга кутан бэлэмнээтилэр.
Түмсүү координатора Жанна Макарова балаҕаҥҥа быйыл сайын көмүлүөк оһохторун өрөмүөннээн биэрбиттэрин этэр. «Харысхаллар» биир да күнү өрөөбөккө үлэлииллэрин киэн тутта кэпсиир. Көмүлүөк оһохторо оҥоһуллар кэмигэр бэрт аҕыйах күҥҥэ тохтуу сылдьыбыттар эрээри, үтүө санаалаах далбардар дьиэлэригэр олорон иистэнэн, госпитальга сытар байыастарга аналлаах таҥастары тикпиттэр, араас харыстыыр, арчылыыр нобуордары оҥорбуттар. Билигин дьон сынньалаҥтан киирэн, нэһилиэктэр, тэрилтэлэр көмөлөрүн ыыта тураллар эбит.
Бу күннэргэ түмсүүгэ сылдьар Мария Сантаева тапталлаах сиэнэ сакаастаан өрдөрбүт сиэккэтин бүтэрдилэр. Бу кэмҥэ байыас уоппускатыгар кэлэ сылдьар буолан, эбээтэ, кини биир санаалаахтара өрбүт сиэккэлэрин кэлэн тутан-хабан көрөн барда, махталын эттэ. Оттон далбар хотуттар уолга этэҥҥэ сылдьан, кыайыы көтөллөөх дойдутугар, тапталлаах дьиэ кэргэнигэр эргиллэн кэлэригэр ис сүрэхтэриттэн баҕардылар.
Альбина Федорова: 
«Анал байыаннай дьайыыга сылдьар уолаттарбытыгар биһиги – ийэлэр, эбээлэр көмө-имэ буолбатахпытына, кимнээх буолуохтарай? Кинилэр онно олус ыарахан усулуобуйаҕа сылдьалларын саныы-саныы киһи сүрэҕэ ытырбахтыыр. Араанньыс буолбут уолаттарбыт госпитальга төһөлөөх ыарыыны тулуйан сытаахтыыллара буолуой? Аны 200 №-дээх куруус буолан кэлбит эдэркээн уолаттар төрөппүттэрэ, кэргэттэрэ, оҕолоро төһөлөөх айманаллара, ытыыллара буолаахтыай? Кинилэргэ эмиэ туох сатанарынан көмөлөһөр биһиги сорукпут. Уоскутар, сүбэ-ама буолар тыллары этэр да тустаах киһиэхэ олус наада. Бу маннык санаалаах мин балаҕаҥҥа кэлэн, бэйэм көмөбүн оҥоробун. Улууһум олохтоохторо, бу ааҥнаабыт алдьархайтан туора турбакка, уолаттарбытыгар, кинилэр дьиэ кэргэттэригэр туох кыалларынан өссө көмөлөһүөххэ диэн ыҥырабын».
Мария Сантаева:
«Мин бу сиэккэ өрүүтэ хара бастакыттан саҕаланыаҕыттан сылдьабын. Манна кэлэн уолаттарбытыгар көмө буолан, кинилэргэ анаан сиэккэ өрөрбүтүттэн санаам көтөҕүллэр. Оҕолорбут барахсаттарга дойдуларын кэһиитэ, мала-сала тиийэн күүстэригэр күүс эбэрин, санаалара көтөҕүллэрин сүрэхпинэн сэрэйэбин, билэбин. Оҕолорбут барахсаттар этэҥҥэ эрэ сылдьыҥ диэн үтүө санаабытын иҥэрэн туран, харыстыыр сиэккэ, наадалаах таҥас-сап тигэбит, ас-үөл, эмп-томп баһыылкалаан ыытабыт».
Мария Григорьева:
«Балаҕаҥҥа кэлэммин тугу сатыырбынан, кыайарбынан көмө буолабын. Бу сайыҥҥы кэмҥэ госпитальга эмтэнэ сытааччы байыастарга анаан ис-тас таҥас тигиитигэр кыттыстым. Анал байыаннай дьайыы түмүктэнэн, уолаттарбыт дьиэлэригэр кэлэллэрин күннэтэ күүтэбин. Түмсүүбүтүгэр дьиэҕэ олорор биэнсийэлээх далбардар күннэтэ кэлэбит. Иистэнэ олорон арааһы кэпсэтэбит, үтүөнү ыраҥалыыбыт».
Людмила Филиппова:
«Биэнсийэлээх киһи быһыытынан дьиэм түбүгүттэн быыс буллум да балаҕаммар кэлэ турабын. Манна биир улахан эппиэтинэһи сүгэммин баһыылка оҥоруутугар сылдьабын. Уолаттарбытыгар ыытар баһыылкаларбытыгар улуус олохтоохторо аҕалбыт кэһиилэрин – минньигэс кэмпиэттэри, оҕолорбут оҥорбут ымыыларын, эми-тому, таҥаһы-сабы угабыт, алгыска туттар нобуордары наардаан анаан ыытабыт. Ону таһынан өрбүт сиэккэлэрбитин кичэллээхтик суулаан кууллубут. Баһыылка оҥоруутун таһынан харыстыыр сиэккэ өрсөбүн. Бэйэбит сылаас илиибитинэн оҥорон ыыппыт баһыылкаларбытын онно сылдьар уолаттарбыт тутан үөрбүттэрин биллэрэн салайааччыларбытыгар суруйдахтарына бары түмсэн олорон ааҕабыт, үөрэбит».
Дьэ, бу курдук, үтүө санаалаах волонтердар күннэтэ балаҕаҥҥа кэлэн үлэлииллэр. Ону сэргэ нэһилиэктэргэ, тэрилтэлэргэ тэриллибит филиаллара үлэлэриттэн быыс буллулар эрэ, туох көмө ыытабыт диэн сураһа, ыйыталаһа олороллорун балаҕан далбардара үөрэ кэпсииллэр.
Яина ВЛАСЬЕВА