Кинигэни ааҕыы хайдахтаах курдук үтүө дьарыгый? Онтон дьиэ кэргэнинэн ааҕыы туһата өссө улахан. Дьиэ кэргэнинэн ааҕыы туһатыгар биир сүрүнэ — оҕону ааҕыыга чугаһатыы буолар. Хомойуох иһин, билиҥҥи информационнай сайдыы кэмигэр, кинигэни төлөпүөн солбуйан, ааҕыы таһыма мөлтөөтө диибит. Онтон ааҕыыны көҕүлүүр сыалтан кинигэ ааҕыытын дьиэ кэргэнтэн саҕалыахха диэн соруктанан, Элгээйитээҕи Уйбаан Нуолур аатынан модельнай уонна К.Е.Иванов аатынан оскуола бибилэтиэкэлэрэ бииргэ холбоһон сылын аайы «Ааҕыыны көҕүлээһин» бырайыак чэрчитинэн үгэскэ кубулуйбут «Ааҕар дьиэ кэргэн» диэн сүрдээх үчүгэй күрэһи ыытар. Бу күрэс успуонсардара бастакы кыайыылаах Эльвира Михайловна, Дуня Спиридоновтар дьиэ кэргэттэрэ буолаллар. Кинилэргэ махталбыт олус улахан.
Бу күрэс оскуола алын кылааһын дьиэ кэргэттэрин ортолоругар ыытыллар. Быйылгы күрэскэ барыта кинигэни доҕор оҥостубут биэс ыал кытынна. Ол курдук, 1-кы кылаастан Элла, Светлана Владимировна Ивановтар, 2-с кылаастан Элеонора, Сардана Васильевна Ефимовалар, 3-с кылаастан Тимур, Мотрена Кузьминична Самойловтар, 4-с «а» кылаастан Семен, Марианна Адольфовна Спиридоновтар, 4-с «б» кылаастан Уйгулаана, Ньургуяна Романовна Ксенофонтовтар дьиэ кэргэттэрэ көхтөөхтүк кытыннылар.
Күрэспит 5түһүмэҕинэн барда. Ол курдук, бастакы түһүмэххэ дьиэҕэ сорудаҕы толорууга киһи сэргээн көрө олоруон эрэ курдук, бииртэн биир үчүгэй бэлэмнээх нүөмэрдэр тахсан истилэр. Саамай бастыҥ биһирэбили норуодунай суруйааччы Софрон Данилов «Манчаары» туһунан новеллатыттан толорбут Самойловтар сценкалара буолла. 2, 3, 4, 5 түһүмэхтэр «Суруйааччылары төһө билэҕин?», «Оскуола 150 сылыгар», «Суруйааччылар айымньылара», «Уопсай билиигэ» 5-тии ыйытыктартан турар билиини тургутааһын буолла. Түмүгэр, «Кыайыыга дьулуурун иһин» анал ааты Ефимовтар, 3-с миэстэни Ксенофонтовтар, 2-с миэстэни Ивановтар, 1-кы миэстэни Спиридоновтар уонна «Кылаан кыайыылаах» үрдүк ааты Самойловтар дьиэ кэргэттэрэ ылан үөрдүлэр-көттүлэр.
Онон оҕолорбутугар дьиэ кэргэҥҥэ кинигэҕэ тапталы иитэрбит — биһиги бары сүрүн сыалбыт буоларын бары түмсэн толордубут дии саныыбыт. Кинигэ баар — бараммат баай.
Людмила ПАВЛОВА, К.Е.Иванов аатынан Элгээйи орто оскуолатын бибилэтиэкэрэ