Улууспутугар кэлэр кыстыкка бэлэмнэнэн, оттук сезонун сүрүн үлэтэ түмүктэннэ. Бу туһунан ОДьКХ Сунтаардааҕы филиалын дириэктэрэ Михаил Петров иһитиннэрдэ.
– Быйылгы сылга уопсайа 23 эбийиэккэ өрөмүөн үлэтэ былааннаммыт. Олортон Аллыҥа, Маар Күөл, Бүлүүчээн, Кутана, Түбэй, Түбэй-Дьаархан, Элгээйи, Устье уонна Сунтаар нэһилиэктэригэр үлэ барда. Ол курдук, Сунтаар нэһилиэгэр Кирова уонна лиссиэй утары Октябрьскай уулусса компенсатордара уларыйдылар. Сунтаардааҕы технологическай колледж аттынааҕы ититии ситимэ (тепловой сеть) саҥардылынна. Алын сүһүөх оскуола аттынааҕы ититии тиһигэр (теплотрасса) өрөмүөн үлэтэ барда. Түбэй нэһилиэгэр 2 саҥа хочуол олордулунна. Кутанаҕа, Түбэй-Дьаархаҥҥа хочуолунай иһигэр баар буруону оборон турбаҕа биэрэр оборудование уларыйда. Элгээйигэ култуура киинин уонна оскуола хочуолунайдарыгар 4 дымовой турба уларыйда. Маны тэҥэ, этиллибит икки бүтэһик нэһилиэккэ хочуол хапытаалынай өрөмүөнэ барда.
Былаан үксүн биир эбэтэр балтараа сыл иннигэр оҥоһуллар буолан, сорох үлэлэр син биир кэнники күөрэйэн тахса тураллар. Ол курдук, өрөмүөн үлэтин тас өттүнэн эбии Бордоҥ нэһилиэгэр хочуол хапытаалынай өрөмүөнүн үлэтэ барыахтаах. Кэлэр сылга диэри тулуйуо суоҕа диэн уларытыахтаахпыт. Былааҥҥа киирбит үлэлэр улахан аҥардара бүтэн, оттукка бэлэм олоробут. Аны, Маар Күөл уонна Бордоҥ нэһилиэктэрэ хааллылар.
Ити этиллибит үлэлэри сэргэ, туох баар ититэр ситимнэрбитин барытын сууйан, ыраастаан саҕалаатыбыт. Буоларын курдук балаҕан ыйын 6 күнүттэн ититии холбонуо.
Елизавета ТИТОВА
(хаартыска куйаар ситимиттэн)