Кэмпэндээйи олохтоох бибилэтиэкэтэ уонна В. И. Иванов аатынан орто оскуола холбоһон бүтүн дойдубут үрдүнэн сыл аайы ыытыллар аахсыйаларга кыттар тэрээһиннэри ыыттыбыт. Арассыыйаҕа Аҕа дойдуну көмүскээччилэр сылларын, Улуу Кыайыы 80 сылыгар анаммыт 7-с төгүлүн ыытылларр «Диктант Победы» аахсыйаҕа барыта 21 киһи кыттыыны ылла. Саамай аҕам саастаах кыттааччы Валентина Федотова, саамай эдэр — 9-с кылаас үөрэнээччитэ Радивер Петров буоллулар.
Онтон «Библиосумерки-2025» социальнай-культурнай аахсыйа «СВОи герои» диэҥҥэ ананан буолла. Манна барыта 3 былаһаакка үлэлээтэ. Бастаан оскуолаҕа алын кылаастарга биир дойдулаахпыт, суруйааччы, саха тылын учуутала Иван Иванов-Уйбаан Нуолур Кэмпэндээйигэ олорон суруйбут «Чооруона саллаат оҕото» айымньы тула буолла. Оҕолор суруйааччы олоҕун, айар үлэтин кытары билистилэр, айымньы ис хоһоонун ырыттылар. Уоттаах сэрии ыарахан сылларыгар улаханныын-кыралыын бары биир күүс буолан Кыайыы иһин туруулаһан хайдах үлэлээбиттэрин бу кэпсээн кыра оҕолорго арылыччы арыйар. Бу сотору буолуохтаах үгэскэ кубулуйбут Кыайыы күнүн кэнсиэригэр оҕолор бу айымньынан испэктээк туруоруохтаахтар. Үрдүкү кылаастарга «БилииБиб» лекторийга Аҕа дойду сэриитин уонна Анал байыаннай дьайыы Дьоруойдарын билистилэр.
Онтон олохтоох бибилэтиэкэҕэ улахан дьоҥҥо ыытыллыбыт «СВОи герои» тэрээһиҥҥэ «Кэмпэндээйи сэрии сылларыгар» диэн ааттаан барда. Манна «Эдэр кыраайы үөрэтээччи» кулууп оҕолоро Кэмпэндээйигэ олорон ааспыт сэрии, тыыл бэтэрээннэрэ эбэлэрин, эһэлэрин туһунан дакылааттарын аахтылар. Ол курдук, Кристина Генерова хос эһэтэ, уот сэрии кыттыылааҕа, сэрии инбэлиитэ Иван Алексеевич Николаев — Төөтөкөөн Бааҕы учаастагар олорон үлэлээн ааспытын кэпсээтэ. Харысхан Семенов хос эбэтэ Пелагея Дмитриевна Данилова сэрии саҕана ыарахан олоҕун, оҕоҕо сөбө суох күүстээх үлэтин, Муоһааны күөлгэ хайдах балыктаабытын, аччыктаабытын туһунан уруһуйдарынан, хаартыскаларынан туттан билиһиннэрдэ, хаһыакка бэчээттэммит эбэтин ахтыытыттан кэпсээтэ. Онтон Лина Иванова аймаҕа, ыраах Бурятияҕа олорбут Сэбиэскэй Сойуус Дьоруойа, снайпер Жамбыл Тулаев уонна Кэмпэндээйигэ туус собуокка экэнэмииһинэн үлэлээбит, сэрии саҕана чулуу снайпер, элбэх бойобуой наҕараадалаах Георгий Федоров биир дивизияҕа, биир снайперскай ротаҕа адьырҕа өстөөҕү кыдыйбыттарын туһунан сэрии саҕанааҕы фронт бойобуой хаһыаттарыгар, өрөспүүбүлүкэ киин хаһыаттарыгар суруллубут ыстатыйалары булан ырыппытын кэпсээтэ. Тэрээһин кыттыылаахтара оҕолору сэргии иһиттилэр, билиилэрин-көрүүлэрин хайҕаатылар.
Нэһилиэкпит баһылыга Александр Игнатьев улуус дэлэгээссийэтин кытары Анал байыаннай дьайыыга сылдьар биир дойдулаахтарбытын көрсөн кэлбит сырыытын кэпсээтэ, санаатын үллэһиннэ. Сэриилэһэ сылдьар уолаттарбытын баран тус көрсөн, күүс-көмө илдьэн кэлэр наадалааҕын, маныаха улууспут дьаһалтата күүстээх үлэни ыытара көрө-билэ сылдьабыт. Александр Романович Кэмпэндээйиттэн төрүттээх уолаттарын үксүлэрин көрсөн, кэпсэтэн кэлбитэ. Маныаха «Арассыыйа ийэлэрэ» түмсүү салайааччыта Любовь Осипова нэһилиэк дьонун түмэ тардан уолаттарга анаан элбэх баһыылкалары оҥорон күүстээх үлэни тэрийэр.
«Библиосумерки-2025» биир кэрэ түгэнинэн быйыл туус хостоммута 385, оскуола аһыллыбыта 90 үбүлүөйдэрдээх сылларыгар анаммыт «Кыбытык» түмсүү тикпит » паннотун ис хоһоонун, үлэтин ымпыгын-чымпыгын салайааччы Вера Семенова кэпсээбитэ буолла. Бу паннону көрөн үгүһү аҕынныбыт, кэпсэттибит. Кырдьаҕастар сэбиэттэрэ (сал. Александра Архипова) бэлэмнээбит полевой куукуналарын минньигэс гречка хааһыларын, алаадьыларын сии-сии урукку саһарбыт хаартыскалары, тыыл бэтэрээннэрин ахтыылара уһуллубут киинэлэрин көрөн тарҕастыбыт.
Аны аҕыйах хонугунан Күөх Маай, Улуу Кыайыы бырааһынньыктарын көрсүөхпүт.
Татьяна МЕСТНИКОВА, бибилэтиэкэр, Кэмпэндээйи