Бүгүн, тохсунньу 16 күнүгэр, улууспутугар С.А. Зверев – Кыыл Уола төрөөбүтэ 125 сылын түмүктүүр, итиэннэ Сунтаар улууһун номоҕун уонна сайдыытын сылын арыйар үөрүүлээх тэрээһинэ буолла. Ол курдук, С.А. Зверев – Кыыл Уола аатынан норуот айымньытын киинигэр ааспыт 2025 сылы түмүктүүр, үүммүт 2026 сылы арыйар дьоро тэрээһиҥҥэ үгүс дьон тоҕуоруһа муһунна.
Кэлбит ыалдьыттар «Сунтаар – үйэттэн үйэлэргэ» диэн быыстапканы сэргии, сэҥээрэ көрдүлэр. Манна икки үйэттэн ордук кэм устата улуус хайдах, туох быһыылаахтык тэринэн, сайдан кэлбитин, талааннаах дьонун, кэрэ-бэлиэ сирдэрин, дириҥ ис хоһоонноох, баай историятын көрдүлэр.
Салгыы, тэрээһин үөрүүлээх чааһа Улуу Киһибит Сэргэй Сибиэрэп – Кыыл Уола үйэлэргэ хаалларбыт дьүһүйүүтүнэн, оһуордаах үҥкүүтүнэн, алгыстаах тоҕус мэҥэ хамсаныытынан, итиэннэ кини ансаамбылын кыттыылааҕа Любовь Кутугутова-Афанасьева тойугунан саҕаланна.
Улууспут аҕа баһылыга Анатолий Григорьев ааспыт сылга ыытыллыбыт тэрээһиннэри, үтүө түмүктэрин, ситиһиилэрин бэлиэтээн туран саҥа сылга эрэллээхтик өссө да үүнэ-сайда, үлэлии-хамсыы турарга уонна эйлээх олох олохтоноругар, анал байыаннай дьайыыга сылдьар биир дойдулаахтарбыт этэҥҥэ эргиллэн кэлэллэригэр баҕаран туран бэйэтин эҕэрдэтин бар дьонугар анаата. Бу күн улуус сайдыытыгар кылааттарын киллэрсэ сылдьар үтүө-мааны дьоммут үрдүк наҕараадаларынан, түөскэ кэтэр бэлиэлэринэн чиэстэннилэр.
Быйылгы Улуус номоҕун уонна сайдыытын сылын дьарылыгын уһуйааччы Мария Попова айан таһаарда. Кини айан таһаарбыт дьарылыга элбэх үлэттэн биир бастыҥынан ааттанан, биһирэбили ылан бигэргэммитэ. Бүгүн бу дьарылыгы аҕам саастаах дьоммут ааттарыттан улуус бэтэрээннэрин Сэбиэтин бэрэссэдээтэлэ Афанасий Васильев баһылык Анатолий Григорьевка ытыс дохсун тыаһыгар туттарда.
Өрөгөйдөөх бэлиэ түгэни улууспут талба талааннаах ырыаһыттара, үҥкүү ансаамбыллара киэргэттилэр. Бу курдук Сунтаарбыт улууһунан киэн туттуоххайыҥ, аар баҕах сэргэтигэр түмсэ туруоххайыҥ!
Елизавета ТИТОВА