Дьаархаммыт нэһилиэгин биир бастыҥ олохтооҕо Владимир Иванов буолар. 1977 сыллаахха оскуолатын бүтэрэн Ийэ дойдутугар ытык иэһин төлөөн кэлээт, Сунтаардааҕы училищеҕа тырахтарыыс идэтигэр үөрэнэр. Дипломун, тимир көлөҕө көҥүлүн ылыаҕыттан бу баччааҥҥа диэри уруулун ыыппакка тырахтарыыстыы сылдьар. Сопхуоска үлэлии сылдьан да, билигин да «Бастыҥ механизатор», «Бастыҥ үлэһит» анал ааттары ылбыта, улуус грамоталарынан, махтал суруктарынан наҕараадаламмыта кини үлэтигэр бэриниилээҕин, эппиэтинэстээҕин туоһулуур.
Владимир 3 оҕо амарах аҕата, элбэх сиэн тапталлаах эһэтэ. Хара үлэттэн толлубакка оҕолорун үөрэхтээн, дьиэлээн-уоттаан, аны билигин сиэннэригэр күүс-көмө буола сылдьар.
«Кыһын тоһуттар тымныыга, сайыҥҥы уот куйааска Болуодьабыт эрэ абырыыр. Ыал ото-маһа кэмигэр чопчу тиэллэн, ыал бур-бур буруо таһааран , ынахтаах, сылгылаах ньир-бааччык тигинээн олоробут. Хаһан даҕаны батынан, аккаастаан кэбиспэт, ханнык баҕарар кэмҥэ кыһалҕалаахха мэлдьи көмөлөһөр», — дэһэллэр олохтоохтор.
Кырдьык, -50⁰С тахса кыраадыска тыраахтыры буолуохтааҕар, массыынаны да таһаарбаттар. Оттон биһиги Больуодабыт дьон кыһалҕатын өйдөөн икки-үс көстөөх сиртэн от астаран аҕалан, саһаан тиэйэн абырыыр. Сайын куйааска араас көһүтүллүбэтэх ыксаллаах быһыы-майгы буолар түгэнигэр бастакынан тылланан барар. «Ойуур уотун умуллаарыыга көмөтүн иһин», «Сунтаар улууһун граждансксай көҕүлээһиннэрин сайыннарыыга кылаатын иһин» бэлиэлэри улуус баһылыга Анатолий Григорьев туттарбыта элбэҕи этэр.
Владимир Иванов ОДьХХ үлэлии сылдьыбыта. Илиинэн чох таһар ыараханын этинэн-хаанынан билэн, быыс булла да хачыгаар уолаттарга чохторун тыраахтырынан чохторун киллэрэн биэрэн көмөлөһөр.
Чөл олоҕу өрө тутар дьиэ кэргэн аҕа баһылыга Владимир Иванов ыччакка бэйэтин үлэтинэн холобур буолар ытыктыыр киһибит буолар. Күн бэҕэһээ оруобуна төрөөбүт күнэ эбит. Улахан махталбытын тириэрдэн туран, итиитик-истиҥник эҕэрдэлиибит.
Анна МАРКОВА, Дьаархан