Аллыҥаҕа «Золотые скамейки» искибиэргэ саҥа хамсааһын, саҥа «олох» саҕалааһына буолла. Искибиэр тутуллуоҕуттан дьэбиннирэ турбут, аатыгар эрэ «Таптал маһа» саҥа тыыннанна!
Бу — тапталы араастаан дьүһүйэн, ойуулан тимиртэн чочуллан оҥоһуллубут «Таптал маһа» туруоҕуттан ыла, нэһилиэкпитигэр балай эмэ дьон сүрэхтэрин холбоон, ыал үрдүк аатын сүгэн дьоллорун холбоотулар. Бу «Мас» соруга — таптаһар сүрэхтэр холбоһор күннэрин, кинилэр тапталларын бэлиэтин өһүлбэт гына күлүүскэ хатаан нэһилиэк «эдэрдэрин» тапталларын үйэлэргэ кэпсиир сыаллааҕа.
Быйыл тапталбыт маһа силигин ситэн, аан маҥнайгы күлүүс дьэ, ыйанна, өһүллүбэт гына «тыла» кистэннэ! Ол курдук аан маҥнайгынан саҥа тапталларын холбуур ыал буолбакка, үйэ аҥара саастаах таптал, кырдьыга даҕаны өһүллүбэт, кырдьыбат, сүппэт, умуллубат «Таптал» туоһулара, кыһыл көмүс сыбаайбалааччылар, 50 сыл бииргэ олорон, олох араас өрүтүн өрүү бииргэ, иккиэ буолан өйөһөн-өйөнсөн тапталы өрө туппут Раиса Алексеевна уонна Федосий Петрович Ивановтар буолуллар!
Мантан салгыы, нэһилиэк ытык ыалын холобур оҥостон олохтоохтору, бу сылга үбүлүөйдээх дьиэ кэргэттэри, таптаһар сүрэхтэри, саҥа холбоһор эдэрдэри «Таптал маһыгар» тапталларын үйэлэргэ хатаан, суолталаах хамсааһыны салҕыыр аахсыйаҕа ыҥырдылар.
Надежда Иванова