Айылҕаттан айдарыылаах, Ийэ сиртэн этитиилээх, Аар тайҕа аптаах ырыаһыта, саха тыллаах айгыр-дьаралык алгысчыта, бэйэтин омугун култууратын, ускуустубатын бары салааларыгар, көрүҥнэригэр уһулуччу улахан тус кылаатын киллэрбит Сэргэй Сибиэрэп-Кыыл Уола төрөөбүтэ 125 сылын көрсө улууска араас хабааннаах тэрээһиннэр утумнаахтык буолаллар.
Сэтинньи 26 күнүгэр, Сунтаардааҕы оҕо ускуустубатын оскуолата улуус хореографтарыгар Сэргэй Сибиэрэп-Кыыл Уола үҥкүүлэрин туруорууга аналлаах сэминээри тэрийэн ыытта. Барыта 7 нэһилиэктэн 17 үҥкүү бөлөҕүн салайааччылара култуура уонна үөрэҕирии салаатыттан кыттыыны ыллылар.
Сэргэй Сибиэрэби саха үҥкүүтүн сценическэй култууратын олугун уурбут киһинэн билинэбит. Кини барыта норуотугар 33 үҥкүүнү айан-тутан хаалларбыт үтүө өҥөлөөх, күн бүгүҥҥэ диэри үрдүк сыанаттан кини үҥкүүлэрин оҕолуун -улаханныын толоробут. 1957 сыллаахха “Оһуор” үҥкүүтүн дойду тэбэр сүрэҕэр Москуба куоракка көрдөрөн, саха омук үҥкүүтүн киэҥ эйгэҕэ таһаарбыта. Кини үҥкүүлэрин үгүс чинчийээччилэр 17 үҥкүүтүн сиэр-туом, 9 үҥкүүтүн оонньуу-үҥкүү көрүҥнэригэр араараллар. Хомойуох иһин, 7 үҥкүүтүн ойуулааһына хаалбатах. Хореограф Сима Петровна Толстякова Сэргэй Сибиэрэп үҥкүүлэрин чинчийиигэ, үөрэтиигэ сүрүн кылаатын киллэрбитэ. 1989 сыллаахха балетмейстер Ангелина Лукина “Сибиэрэп буочарынан” уонна кини үҥкүүтүн хамсаныыларын чопчулаан туран “Оһуор” үҥкүү биир ураты варианын оҥорбута. Сэргэй Сибиэрэп-Кыыл Уола төрөөбүтэ 100 сылын көрсө, кини уола Дмитрий Сергеевич Зверев көҕүлээһининэн, Сибиэрэп маҥнайгы ансаамбылын кыттааччыта Мария Филипповна Кириллина көмөтүнэн 1957 сыллаахха Москубаҕа туруорбут үҥкүүтэ сөргүтүллүбүтэ.
Норуот тылынан уус-уран айымньытын бары көрүҥэр дэгиттэр талааннаах сүдү киһибит өрөгөйдөөх үбүлүөйүн көрсө Сунтаардааҕы оҕо ускуустубатын оскуолата «Удьуор ситимэ” үҥкүү бырайыагын иккис сылын үлэлэтэр. Сэминээргэ Сэргэй Сибиэрэп үҥкүүлэрин СӨ култууратын үтүөлээх үлэһитэ Сима Петровна Толстякова, СӨ култууратын туйгуна Раиса Павловна Макарова туруорууларын туһанныбыт. Сунтаардааҕы оҕо ускуустубатын оскуолатын үҥкүүгэ уһуйааччылара Чойнова Анна Васильевна “Ситим” , Захарова Ольга Егоровна “Алгыс”, Аввакумова Ирина Еремеевна “Хотой”, Григорьева Саргылана Авиациевна «Оһуор” үҥкүүлэригэр маастар-кылаастары ыыттылар. Үҥкүүлэр хамсаныыларын чопчулаан улуус үҥкүүһүттэрин ансаамбылын салайааччыларыгар уопуттарын тарҕаттылар. “Айыллыы” (Сунтаардааҕы оҕо ускуустубатын оскуолата) үҥкүү бөлөҕүн оҕолоро Сэргэй Сибиэрэп- Кыыл Уола “Ситим”, “Алгыс” үҥкүүлэрин үҥкүүлээн көрдөрдүлэр. Айылҕаттан айдарыылаах улуу киһибит үҥкүүлэрин туруорууга С.А.Сибиэрэп-Кыыл Уолун аатынан үҥкүү театрын кытта бииргэ үлэлэһэбит.
Норуокка киэҥник биллэр «Оһуор» үҥкүүтэ Сибиэрэп ансаамбылын кыттыылаахтарын ахтыыларыгар, 1957, 1967 сыллаах үҥкүүнү устуу архыыптарыгар, М.Ф.Кириллина туруорбут үҥкүүлэригэр олоҕуран үҥкүү хамсаныыларын чопчулуур үлэ бара турар. Үҥкүүнү толорууга М.К. Аммосов аатынан ХИФУ «Уран» үҥкүү ансаамбылын кытта ситимнээх үлэ тэриллэ сылдьар.
Ытык киһибит Сэргэй Сибиэрэп-Кыыл Уола төрөөбүтэ 125 сылын көрсө үҥкүүлэрин үрдүккэ көтүтүөҕүҥ!
Надежда ЯКОВЛЕВА, Сунтаардааҕы оҕо ускуустубатын оскуолатын директоры иитэр үлэҕэ солбуйааччыта