Анал байыаннай дьайыыга сылдьар биир дойдулаахтарбытын өйөөн, кинилэргэ тирэх буолан, улууска олорор, үлэлиир дьон бары көмөлөрүн ыыта олороллор.
Бу соторутааҕыта улууспут киэн туттар, ытыктыыр, инники күөҥҥэ тутар кырдьаҕаспыт Галина Николаева антах сылдьар байыастарга анаан олус наадалаах эмтэри аҕалан волонтердарга туттарда. Ону сэргэ кэмпиэт арааһын биир коробкаҕа уган кэһии ыытаары биэрдэ. Бу баһыылканы Николаевтар дьиэ кэргэттэрэ сүбэлэһэн оҥорбуттар.
«Уолаттарга бу эмтэр туһалаатыннар. Оҕолорбут этэҥҥэ кэлэллэрин улууспут дьоно-сэргэтэ күннэтэ күүтэбит. Мин төһө да сааһыран дьиэҕэ олордорбун, кыра да буоллар көмөбүн оҥордохпуна уоскуйабын. Ол дойдуга ким эрэ тапталлаах оҕото, ким эрэ эркин курдук эрэнэр кэргэнэ, амарах аҕа, убай, быраат патриоттуу күүстээх санааланан эйэлээх олох иһин охсуһаллар, сырдык тыыннарын толук уураллар. Санаатахха киһи сүрэҕэ ыалдьар, хараастар. Оттон бу кыра көмөм – эмим оҕолорбут сырдык тыыннарын өрөһүйдүн», — диэн Галина Махметуловна санаатын үллэһиннэ.
Кырдьаҕас ийэ, эбэ баҕа санаата туоллун.
Яина ВЛАСЬЕВА