Кириэстээх нэһилиэгэр кулун тутар 20 күнүгэр дирижер, хормейстер, учуутал — сүбэһит, РСФСР норуотун үөрэҕириитин туйгуна, педагогическай үлэ бэтэрээнэ Зинаида Георгиевна (Егоровна) Максимова төрөөбүтэ 75 сылын бэлиэтиир дьоро күнэ И.Г. Спиридонов аатынан Кириэстээх орто оскуолатыгар ыытылынна.
Бу күн кини аатын оскуола актовай саалатыгар иҥэрии үөрүүлээх чааһа бастаан оскуола үөрэнээччилэригэр анаан тэрилиннэ.
Күндү ыалдьыттарынан буоллулар З.Г. Максимова оҕолоро: үрдүкү категориялаах технология учуутала, СӨ архитектурнай үөрэхтээһиҥҥэ кылаатын иһин бэлиэ хаһаайына Андриан Максимов, РФ үөрэхтээһинин уонна иитиитин Бочуоттаах үлэһитэ, саха тылын, литературатын үрдүкү категориялаах учуутала Фаина Капитонова, финансист үөрэхтээх, “Японец” маҕаһыын тутаах үлэһитэ Лидия Тимофеева. Тэрээһиҥҥэ нэһилиэк баһылыгын солбуйааччы Алексей Корякин, Тойбохойтон ыалдьыппыт РСФСР норуотун үөрэҕириитин туйгуна, педагогическай үлэ бэтэрээнэ Клара Степановна Тихонова кыттыыны ыллылар.
Үөрүүлээх чаас үрдүкү кылаас оҕолорун бөлөҕүн ырыатынан, дириэктэр Евгений Тараяров эҕэрдэтинэн саҕаланна. Бэтэрээн учуутал Наталья Васильева, дьүөгэлэрин, үөлээннэхтэрин ааттарыттан истиҥ иһирэх ахтыыны оҥордо. “Саргы түһүлгэтэ” култуура киинин аатыттан Карина Васильева, Руслана Ордахова эҕэрдэ сурук туттардылар.
Зинаида Георгиевна (Егоровна) Максимова анал стипендиятын Дипломнарвн туттулар Семеновтар, Михайловтар дьиэ кэргэттэрэ.
Көҕүлээччи, тэрийээччи аатын умуннарбакка сылдьар «Иэйии» ансаамбыл тэриллибитэ быйыл эмиэ 35 сылын бэлиэтиир. Ансаамбыл Горнай Мытааҕыттан Павловтар аймах аатыттан Диплом уонна сценическай көстүүм тиктэргэ анаан сертификат тутта. Оскуола актовай саалатыгар акустическай комплегы бэлэх уунан долгуттулар.
Кэнэҕэски ыччакка үтүө өйдөбүл буолан тиийэр дириҥ суолталаах тэрээһин биир үөрүүлээх, долгутулаах түгэнинэн истиҥ эҕэрдэлэр, дириҥ махталлар буоллулар. Зинаида Георгиевна оҕолорун, сиэннэрин, аймахтарын аатыттан ийэлэрин сырдык аатын үйэтитэр тэрээһиҥҥэ күүс — көмө буолбут дьоҥҥо Махтал суруктары, дьоһуннаах анал бэлиэлэри туттардылар.
“Жизнь — труд и творчество, подаренные людям” Зинаида Максимова олоҕун, үлэтин сырдатар киэҥ быыстапка турда. Манна оҕолоро эбии бэйэлэрэ анал стендэ оҥорон аҕаллылар, саһарбыт хаартыскалар, кинигэлэр, альбомнар, харалла сыппыт сэбиэскэй кэм саҕанааҕы муусука тэриллэрэ, үстүрүмүөннэр араастара турбуттар.
Ахтыы улахан киэһэтигэр үөрэнээччиилэрэ, аймахтара, кэлиэгэлэрэ, кэлэктиип бары үлэһиттэрэ, аҕам саастаах дьоммут мустан санаа атастастылар, махтал үтүө тылларын оҕолоругар, аймахтарыгар тиэртилэр. Үтүө дьон аата үйэлэргэ умнуллубатын!
Людмила ДАНИЛОВА,
уопсастыбаннай кэрэспэдьиэн