Бу үүммүт 2024 сыл биһиги улууспут успуордугар ситиһиилэрдээх саҕаланна диэххэ сөп.
Ол курдук, тохсунньу 4-6 күннэригэр Уус Алдан Бороҕонугар ыытыллыбыт Саха сиригэр успуорт сайдыытыгар улахан өҥөлөөх, Саха сиригэр физкультурнай, спортивнай хамсааһын төрүттээччитэ, биллиилээх судаарыстыбаннай, уопсастыбаннай диэйэтэл Николай Николаевич Тарскай төрөөбүтэ 100 сылын туолуутугар ыытыллыбыт саха омугар бастакы нүөмэрдээх успуорт көрүҥүнэн биллэр көҥүл тустууга өрөспүүбүлүкэҕэ биирдиилээн уонна хамаанданан бастыыр иһин чөмпүйэнээккэ Сунтаар улууһун сүүмэрдэммит хамаандатын тустууктара үһүс миэстэ буолан тустууну таптааччылары сүрдээҕин үөртүлэр.
Хамаанда үһүс төгүлүн субуруччу (2022, 2023, 2024) бочуоттаах үһүс миэстэ буолла. Манна таарыччы эттэххэ, бу сырыыга 65 кг бастаабыт Дьулустан Тотонов көҥүл тустууга Арассыыйа успуордун маастарын нуорматын толорбутун туоһулуур докумуонун тутта.
Бу Тарскай кэриэһигэр ыытыллар Саха сирин чөмпүйэнээтигэр ХХ үйэҕэ киирэн баран Чурапчы аҕыста, Уус Алдан биэстэ, Дьокуускай түөртэ, СГУ иккитэ, Нам, Сунтаар (2017 сыллаахха бэйэбитигэр буолбукка), Манчаары дойдута Мэҥэ Хаҥалас биирдиитэ бастаабыттара.
Тустууну таптааччылар ааттарыттан бары бөҕөстөрбүтүн, көҥүл тустууга улуус сүрүн тириэньэрин, икки тустуу маастарын Николай Даниловы, улуус успуордун салайааччытын, икки тустуу маастарын Семен Павловы улуус тустууга Федерациятын бэрэссэдээтэлин, улууспут баһылыгын Анатолий Григорьевы бу ситиһиилэринэн эҕэрдэлээн туран, инникитин өссө үрдүк ситиһиилэри баҕарабыт.
Көҥүл тустууга улуус сүүмэрдэммит хамаандатын сүрүн тириэньэрэ, РФ уонна СӨ успуордун маастара Николай Данилов иитиллээччитэ, инники эрэлбит Лев Павловтыын.
Борис НИКОЛАЕВ