Соторутааҕыта Дьокуускай куоракка ыытыллыбыт үлэһит дьахталлар Бүтүн Саха сиринээҕи бастакы сийиэстэрин 100 сылыгар аналлаах пуорумҥа Сунтаарбыт улууһуттан 18 делегат кыттыыны ылан кэллэ. Кинилэр истэригэр уопсастыбаннай үлэҕэ, ыытыллар араас тэрээһиннэргэ көхтөөхтүк кыттар, улууспут биир бастыҥ үлэһит дьахталлара бааллар.
Делегаттар пуорум иитинэн «Дьахталлар доруобуйаларын туруга уонна үлэ харыстабыла», «Дьахталлар Кыайыыга кылааттара», «Тыа сирин дьахталлара чөл көлүөнэни үүннэриигэ оруоллара», «Дьахтар хамыыһыйаларын уонна ыччат сэбиэттэрин нөҥүө хамсааһын кэскилэ» о.д.а. дискуссионнай былаһааккаларга сылдьан үлэлээтилэр, араас туһалаах маастар-кылаастарга дьарыктаннылар. Маны сэргэ, СӨ Ил Түмэнин уораҕайыгар өрөспүүбүлүкэ парламентарий дьахталларын общественнай-политическай кулуубун киэҥ мунньаҕар улуус дьокутааттарын Сэбиэтин бэрэссэдээтэлэ Ульяна Попова, улуус Сэбиэтин дьокутааттара Жанна Макарова уонна Ольга Лазерева сылдьан бэйэлэрин көрүүлэрин үллэһиннилэр, санааларын атастастылар.
Салгыы тэрээһин туһунан улууспут делегациятын иилээн илдьэ сылдьыбыт Тамара Иванова бу курдук этэр:
Бу тэрээһиҥҥэ Үлэ министиэристибэтэ квота көрөн улууспут көхтөөх дьахталларын илдьэ баран кэллибит. Ону таһынан, Сунтаар улууһун уопсастыбаннай сэбиэтин бэрэссэдээтэлэ Надежда Львова, улуус дьахталларын Сэбиэтин бэрэссэдээтэлэ Александра Иванова, Сунтаардааҕы “Арассыыйа Ийэлэрэ” хамсааһын салайааччыта Дария Григорьева, идэлээх сойуустар түмсүүттэн Антонина Кириллина салайааччылаах тыа хаһаайыстыбата, үөрэҕирии уонна култуура салаатыттан бэрэстэбиитэллэр о.д.а. баран кыттыыны ыллылар. Саамай долгутуулаах түгэнинэн, биһиги улуустан бастыҥ үлэлээх Дария Григорьева, Ольга Лазерева уонна Мария Яковлева үрдүк наҕараада ылбыттара буолар. Ону тэҥэ, сааскы маҥнайгы бырааһынньыгы көрсө, биһиги үстэн элбэх оҕолоох ийэлэргэ “Ийэ Албан аата” бэлиэҕэ 3 ийэҕэ докумуон толорон ыыппыт буоллахпытына, үһүөн ити үрдүк наҕараадаҕа хапсан үөрүүбүт үксээн кэллэ. Биһигини кытта КСВО «Харысхал» түмсүү чилиэттэрэ эмиэ бу тэрээһиҥҥэ кыттан кэллилэр. Кинилэр Хаҥалас улууһун Улахан-Аан нэһилиэгэр тахсан анал байыаннай дьайыыга сылдьар уолаттарбытыгар волонтерскай көмө оҥоруутун тула кэпсэттилэр, уопут атастастылар. Тэрээһин үрдүк таһымҥа буолан ааста, кыттааччылар олус астынан кэллибит.
Елизавета ТИТОВА