Ис-иһиттэн сырдыы сылдьар эйэҕэс мичээрдээх, намыын холку куолаһынан кимиэхэ баҕарар үтүөнү сүбэлии, истиҥ сыһыанынан көмөлөһө сылдьар эдэркээн эмчит кыыс Айталина Давыдовна биһиги балыыһабытыгар үлэлии кэлбитэ номнуо 32 сыл буолбут эбит.
Айталина Иванова оскуолаҕа, медучилищеҕа үөрэнэр сылларыттан уопсастыбаннай үлэҕэ көхтөөх көҕүлээччи, тэрийээччи. Оскуола кэннэ комсомол путёвкатынан «Оскуола-производство-үрдүк үөрэх кыһата» девиһинэн фермаҕа ньирэй көрөөччүнэн үлэлии тахсыбыт. Онно үрдүк ситиһиилээх үлэтин иһин «Молодой гвардеец II пятилетки» буолбута. Дьокуускайдааҕы медицинскэй училищеҕа үөрэнэ киирбитэ. Ээр-сэмээр сылдьан үлэни-хамнаһы үмүрүтэн кэбиһэр, ылыннарыылаах тыллаах, салайар дьоҕурдаах үлэһит кыыс олох оргуйар үөһүгэр, үлэ эргийэр киинигэр анньыллан хаалара. Ол курдук устудьуоннуур сылларыгар сайын аайы тутуу этэрээтэ хамандыырынан сылдьыбыта. Үөрэҕин ситиһиилээхтик бүтэрэн Сунтаар оройуонугар анаммыта. Хороҕо биэлсэр пуунуттан үлэтин саҕалаабыта. 1991 сылтан Элгээйигэ үлэлиир.
Айталина Давыдовна С.С. Яковлев аатынан Элгээйи учаастактааҕы балыыһатыгар 14 сыл ыстаарсай сиэстэрэнэн үлэлээбитэ. Ити сылларга балыыһаҕа стационар реконструкцията, амбулаторияны үлэҕэ киллэрии кэлэктииби элбэх субуотунньукка тардыы, сүрүн үлэ таһынан түбүгүрүү элбэх этэ. Хас да сайын профсойуус тэрийиитинэн үлэһиттэр оҕолоругар, спортсмен оҕолорго, мөлтөх доруобуйалаах (ЧБД) оҕолорго чэбдигирдэр лааҕырга начальниктаабыта. Сметатын былаанын эрдэ оҥорон хамыыһыйаҕа киллэрдэҕинэ көҥүл ылара. Биир саас халаан уута суолу ылан турдаҕына, кини хорсуннук эбэни туораан докумуонун кэмигэр туттаран лааҕырбыт аһыллыбыта. Оҕолору лааҕырга чэбдигирдии педиатр быраас анааһынынан барара: тииһи санациялааһын, диетотерапия, витаминотерапия, физиотерапия, фитотерапия, илбийии ананара.
Лааҕырга сынньаммыт спортсмен оҕолор «Азия оҕолоругар» кыттан, кыайыылаах кэлэн үөрдүбүттэрэ.
Айталина Давыдовна ыстаарсайдыыр кэмигэр сиэстэрэлэр кини сүбэтинэн, көмөтүнэн, ирдэбилинэн бэлэмнэнэн аттестационнай хамыыһыйаҕа үлэ суруйан квалификационнай категорияларын үрдэппиттэрэ.
Өр сылларга Элгээйи тубсанаторийыгар ыстаарсай сиэстэрэнэн үлэлээбит доруобуйа харыстабылын бэтэрээнэ Анна Ефремовна Айталина Давыдовна үлэтиттэн астынарын биллэрэн, бэйэтин гранын анаан, алҕаан туран туттарбыта.
Киһи бэйэтигэр туох эрэ дьиктини арыйар, бэйэтин ис кыаҕын тургутан көрөр буоллаҕына, олоҕо баай ис хоһооннонор. Биһиги Давыдовнабыт биир үлэни бүтэрэн баран, атын үлэни ылсыытын сынньалаҥын курдук ылынар.
Ол курдук иистэниэн, ас астыан, сир астыан, балыктыан, оҕолорунаан, сиэннэринээн сынньанар бириэмэ да ордорунуон сөп. Кэлиҥҥи кэмҥэ техникаҕа, эргиэҥҥэ дьоҕурун көрдөрөн сөхтөрөр. Онно бары хабыллан, онтон тииһинэн үөрүүбүтүн үллэстэбит. Айталинабыт маҕаһыыныттан балыыһатыгар, нэһилиэккэ ыытыллар тэрээһиннэргэ үгүстүк спонсордыыр.
Сайын нэһилиэк ыһыаҕар минньигэс астаах хорчуоппа тэрийэн Миронова Мария Гаврильевна аатынан гран хаһаайката буолбута. Оҕолоро үөрэххэ, үлэҕэ ситиһиилэринэн ийэлэрин үөрдэллэр. Кыыстара Алёна үҥкүү, экономист үрдүк үөрэхтэрин кыһыл дипломнаах бүтэрбитэ, күтүөттэрэ Владиктыын урбаан эйгэтигэр үлэлииллэр. Үҥкүү кэрэ эйгэтигэр үөрэтэр чааһынай оскуолалаахтар, икки оҕо тапталлаах төрөппүттэрэ.
Улахан уол Вадим хайа инженерэ идэлээх, «Анаабыр алмаастарыгар” үлэлиир, ыал.
Кыра уол Айсен 11-с кылаас үөрэнээччитэ, спортсмен.
Айталина Давыдовнабыт бу ааспыт сайын биһигини, балыыһа бэтэрээн үлэһиттэрин, хастыыта да суолунан хааччыйан сир аһыгар сирдээн илдьитэлии сырытта, айылҕаҕа таһааран туһалаахтык сынньатан эдэр кэммитин эргиттэ!
Идэлээх үлэтин туһунан эттэххэ, эмчит быһыытынан билиитэ-көрүүтэ, сатабыла эдэр үлэһиттэргэ мэлдьи холобур буолар. Ыарыһахтар чэпчэки илиилээх, кыһаллыгас, эйэҕэс, эрэллээх эмчиттэрин ытыктыыллар, махтаналлар.
Айталина Давыдовна үлэтэ РФ доруобуйатын харыстабылын министиэристибэтин бочуотунай грамотатынан бэлиэтэммитэ.
Сахабыт сиригэр быйыл Үлэ сыла биллэриллибитинэн С.С. Яковлев аатынан Элгээйи врачебнай амбулаториятын үрдүк категориялаах сиэстэрэтэ, профсойуус кэмитиэтин көхтөөх чилиэнэ, нэһилиэкпит «Арассыыйа ийэлэрэ» уопсастыбатын чилиэнэ, дьоһун-мааны ыал ийэтэ, үтүө үлэһит, кэрэ киһи Айталина Давыдовна Иванова туһунан билиһиннэрдим.
Биһиги аттыбытыгар маннык дьон баар буолан олохпут сайдар, кэскилбит кэҥиир!
Маргарита Заболоцкая, доруобуйа харыстабылын бэтэрээнэ.