Былырыын Үлэ сылыгар Ил Дархан Айсен Николаев 300 тыһ. солк. кээмэйдээх харчынан бириэмийэлээх «Үлэ киһитэ» диэн саҥа бириэмийэни олохтообута. Бу бириэмийэ мантан ыла өрөспүүбүлүкэ 50 бастыҥ үлэһитигэр сыл аайы туттарыллар. Бэлиэтээн эттэххэ, кыайыылаахтары сүүмэрдээһин үс түһүмэҕинэн барар, быйыл 221 сайаапка киирбит.
Бириэмийэ тутааччы 50 киһи иһигэр Сунтаар улууһуттан – иккилэр. Ол курдук, улууспут биир бөдөҥ соҕотох бырамыысыланнай «Сунтарцеолит» тэрилтэтин үлэһитэ Андрей Пахомов уонна Сунтаардааҕы «Якутлесресурс» ГАТ тэрилтэ кылаабынай инженерэ Василий Яковлев «Үлэ киһитэ» быйылгы бириэмийэ хаһаайыннара буоллулар.
Андрей Пахомов 16 сааһыттан 30 сыл биир тэрилтэҕэ үлэлиир бульдозерист. Кини оскуоланы бүтэрэн баран СПТУ-га үөрэнэн, 1994 с. машинист-тырахтарыыс идэтин бүтэрбитэ. Тута «Сунтарцеолит» тэрилтэҕэ киирэн күн бүгүнүгэр диэри үлэлии сылдьар. Андрей Альбертович: «Аан бастакы улахан тыраахтырдары баһылаабытым. Мин сүбэбинэн экскаватордарга мегарыхлитель диэн ыламмыт үлэбит балтараа төгүл түргэтээтэ. Үлэлиирим тухары эдэр дьоҥҥо сүбэ-ама буолабын. Ыччаттарга бырамыысыланнай идэни баһылаан, бэйэҕит дойдугутугар ситиһиилээхтик үлэлииргитигэр баҕарыам этэ». Тэрилтэ салайааччыта Петр Попов: «Андрей Альбертович биһиги тэрилтэбитигэр СПТУ-ну бүтэриэҕиттэн, 16 сааһыттан үлэлиир. Онон үлэтин киниискэтигэр биир эрэ бэлиэтээһиннээх үлэһит. Кини чоҕу, цеолиты хостуур ыарахан уйуктаах бульдозерга, экскаваторга үлэлиир. Билигин биир тутаах бэриниилээх үлэһиппит. Олохтоох киһи буолан идэтигэр бэриниилээх, сүрдээх патриот. Кини билигин уопута номнуо элбээн эдэр дьоҥҥо үгүс элбэх билиитин-көрүүтүн үллэстэр».
Василий Яковлев Маар Күөл нэһилиэгиттэн төрүттээх. 1990 с. Сибиирдээҕи технологическай институкка үөрэнэн «Лесное дело» идэтин баһылаабыт. Ойуур хаһаайыстыбатыгар 1984 с. леснигынан үлэтин саҕалаабыт, Таатта улууһун лесхоһун кылаабынай леснигынан, Маар Күөллээҕи уонна Сунтаардааҕы ЖКХ тэрилтэтигэр салайааччынан үлэлээбит. Онтон 2008 с. «Якутлесресурс» судаарыстыбаннай автономнай тэрилтэ Сунтаардааҕы филиалыгар дириэктэринэн ананан ситиһиилээхтик үлэлээбитэ. Быйылгыттан кылаабынай инженерынан үлэлии сылдьар. Кини салайан олорбут кэмигэр тэрилтэ өрөспүүбүлүкэбитигэр бастыҥ көрдөрүүлээхтэр ахсааннарыгар киирэрэ. Тэрилтэ ойуурга баһаартан куттал суох буоларын хааччыйарга, ойуур баһаарын умулларарга, ойуур хаһаайыстыбатын үлэлэрин ыытарга сүрүн оруолу уурар. Судаарыстыбаннай сорудах чэрчитинэн, өрөспүүбүлүкэ сиригэр-уотугар ойууру саҥардар, харыстыыр, араҥаччылыыр аналлаах үлэлэр сылын аайы былааннаахтык туолара бэлиэтэнэр.
Яков Яковлев, ГАУ «Якутлесресурс» Сунтаардааҕы филиалын дириэктэрэ:
— Василий Иванович тэрилтэбит тэриллиэҕиттэн дириэктэринэн үлэлээбит биир саамай ытыктыыр, тутаах үлэһиппит уонна холобур оҥостор киһибит буолар. Кинини уопыттаах, инициативалаах, сатабыллаах исписэлиис, туруоруллубут соруктары толору кээмэйинэн уонна үрдүк хаачыстыбалаахтык толорор, быһаарсар. Араас кыһалҕалары быһаарыыга эппиэтинэстээх уонна айымньылаах сыһыаннаах, тэрилтэни салайыыга табыгастаах, хаачыстыбалаах быһаарыылары ылан үрдүк көрдөрүүлээхтик үлэлээбит киһинэн билинэбит. Бу бэлиэ түгэнинэн, үрдүк наҕарааданы ылбытынан олус үөрэн, долгуйан туран бииргэ үлэлиир кэллиэгэлэрин уонна тус бэйэм ааппыттан истиҥ эҕэрдэбитин тириэрдэбит.
Биир дойдулаахтарбытын эҕэрдэлиибит!
Юлия АЛЕКСЕЕВА, Алена ИВАНОВА