Ахсынньы 7 күнүгэр Элгээйигэ Саха сиригэр бастакы Үлэ Дьоруойа, «Үлэ Кыһыл Знамята» уордьан кавалера, учуутал, биллиилээх кыраайы үөрэтээччи Петр Хрисанфович Староватов төрөөбүтэ 150 сылын бэлиэтиир дьоро тэрээһиннэр буоллулар. Бу тэрээһиҥҥэ Дьоруой өр сылларга үлэлээбит, кини аатын сүгэр Бүлүүтээҕи кыраайы үөрэтэр түмэлтэн делегация кэлэн кытынна. Тэрээһин Элгээйи оскуолатын кэлэктиибэ, олохтоох дьон кыттыылаах Петр Хрисанфович олоҕун көрдөрөр дьүһүйүүттэн саҕаланна. Ол кэннэ Сунтаар улууһун баһылыга Анатолий Григорьев кэлбит дьону, ыалдьыттары II-с региональнай Староватовскай ааҕыылар саҕаламмыттарынан эҕэрдэлээн тыл эттэ, үөрэҕириигэ бигэ кылааттаах үлэһиттэргэ наҕараадалары туттардылар.
Бу күн Элгээйи орто оскуолатыгар Бүлүү түмэлин Староватовка аналлаах киэҥ ис хоһоонноох, элбэх экспонаттаах быыстапката турда.
Салгыы П.Х. Староватов аатынан Элгээйи орто оскуолатыгар II-с регионнааҕы Староватовскай ааҕыылар буоллулар. Бу ааҕыыларга оҕолор да, улахан да дьон кытыннылар. Тэрээһин түмүктүүр чааһа Элгээйи орто оскуолатын аактабай саалатыгар буолла. Манна Староватовскай ааҕыылар кыайыылахтарын наҕараадалаатылар.
Дмитрий ЫМЫЧАНОВ.