Бүгүн Сунтаардааҕы дьарыктаах буолуу киинэ үлэ дьаарбаҥкатын тэрийэн ыытта. Дьаарбаҥкаҕа 124 үлэҕэ наадыйааччы сырытта. Бүгүҥҥү күн туругунан улуус үрдүнэн 139 киһи үлэтэ суоҕунан учуокка турар. Билигин тэрилтэлэр үксүлэрэ анал идэлээх эрэ үлэһиккэ наадыйаллар. Ол иһин, дьарыктаах буолуу киинэ дьону араас үөрэхтэргэ үөрэттэрэр. Александр Николаев Сунтаардааҕы дьарыктаах буолуу киинин салайааччыта: » Былырыын «Демография» национальнай бырайыагынан 35 киһини үлэнэн хааччыйбыппыт. Киин нөҥүө 67 дьону «Б», «С» категорияҕа, белаз, бульдозер, экскаватор суоппардарыгар, охрана, 1С бырагыраамаҕа үөрэттэрбиппит. Билигин бу дьонтон сорохторо үлэнэн хааччылыннылар. Быйыл 11 киһини үөрэттэрэбит. Билигин младшай медсестра, парикмахер идэтигэр үөрэтэ сылдьабыт. Ыам ыйыттан охрана, бульдозер суоппара, «С» категорияҕа үөрэниэхтэрэ».
Билигин үлэһиккэ наадыйар тэрилтэлэр «Работа в России» порталга үлэ миэстэтин ыйдахтарына дойду араас муннугуттан көрүөххэ, билсиэххэ сөп. Үлэ дьаарбаҥкатыгар саамай элбэх үлэ миэстэтин доруобуйа харыстабыла таһаарда. Ол курдук, тэрилтэҕэ терапевт быраас, эндоскопист, рентгенолог, каадыры кытта үлэһиккэ, уборщиктарга, санитаркаларга уо.д.а. идэлэргэ наадыйалларын иһитиннэрдилэр. Улуустааҕы үөрэҕирии салалтатын каадыры
кытта үлэһитэ Елена Егорова: «Үлэ дьаарбаҥкатыгар номнуо 2 дипломнаах үлэ көрдөөччүлэри бэлиэтии көрдүм. Салгыы үлэлэһэргэ бэлэммит» диэн иһитиннэрдэ. Сунтаардааҕы технологическай колледж үлэһит көрдүүрүн тэҥэ кэлэр үөрэх дьылыгар ханнык үөрэхтэр баалларын туһунан билиһиннэрдэ. Үлэ дьаарбаҥкатыгар саамай улахан хамнаһы “Сунтарцеолит” бырамыысыланнай тэрилтэ эрэннэрэр. Ол курдук, улахан уйуктаах массыыналарга суоппар, тырахтарыыс, хайа маастара диэн үлэ миэстэтин таһааран олорор. Ону тэҥэ, “Алроса” АК үлэ миэстэтин билсиэххэ сөп. Тыа хаһаайыстыбатын салаатыгар бэтэринээр, зоотехник, технолог идэлээх дьон наада. Үлэ таһаарааччылар маннык үлэ дьаарбаҥкаларын салгыы нэһилиэктэргэ ыытыахха диэн сүбэлэстилэр.
Мира АФАНАСЬЕВА
