Быйыл Сунтаар сэлиэнньэтэ төрүттэммитэ 260 сылын чэрчитинэн араас хабааннаах тэрээһиннэр тиһиктээхтик ыытыллаллар.
Олортон биирдэстэрэ Л.А.Попов аатынан кииннэммит бибилэтиэкэ тэрийиитинэн оскуола үөрэнээччилэригэр уонна улахан дьоҥҥо историко-краеведческай ааҕыы ыытылынна. Бу тэрээһин кииннэммит бибилэтиэкэни кытары Сунтаар нэһилиэгин уонна улуус дьаһалталара, улуус култууратын уонна айылгытын салаата өйөөһүннэринэн бэрт сытыытык ыытылынна. Ол курдук, ааҕыыга кэтэхтэн 60 киһи кытынна. Кыттааччылар улуус үгүс нэһилиэктэриттэн бааллар. Бу 60 киһиттэн – 37-тэ үөрэнээччи. Манна даҕатан эттэххэ, биһиги улууспут оҕолоро олус көхтөөхтөрө, барыга бары кыттан иһэллэрэ кими баҕарар үөрдэр.
Билиилэрин хаҥатан, элбэҕи да үлэлээбиттэрин бу күрэскэ ыыппыт үлэлэриттэн ааҕаҕын, билэҕин. Кыттааччылар балаһыанньа быһыытынан «Төрөөбүт улууһум, нэһилиэгим историята», «Улуус үбүлүөйдээх тэрилтэлэрэ», «Нэһилиэгим ытык кырдьаҕастарын сэһэннэриттэн, кэпсээннэриттэн» диэн үс тиэмэнэн дакылаат суруйан, бэлэмнээн ыыппыттар. Холобур, үлэһит, үтүө дьоммут ааттарын үйэтитэн Кутана нэһилиэгин уулуссаларыгар иҥэрбиттэрин, оҕолор хос-хос эһэлэрин, эбэлэрин дьарыктарын, кимтэн кииннээхтэрин, хантан хааннаахтарын, төрүттэригэр туох дьарыктаах дьон олорон ааспыттарын уо. д.а. тустарынан үгүс үлэлэргэ ааҕаҕын. Улуу кыайыы 80 сылын көрсө оҕолор да, улахан да дьон сэрии тиэмэтин таарыйбыттар, чуолаан Кэмпэндээйи холуонньатын историятыттан. Маннык ааттыы турдахха элбэх.
Хата, мин күрэс кыттыылаахтарын үлэлэрин сыаналыырга эксперт быһыытынан үлэлэһэн, элбэҕи биллим, чуолкайдастым.
Киирбит үлэлэр үгүстэрэ ирдэниллэр тиэхиньиичэскэй сорудаҕын тутуспуттара, кэпсиир, суруйар тиэмэлэрин чуолкайдык арыйбыттара көстөр.
Маны сэргэ биир туспа түһүмэҕинэн киинэ, видеоролик устуутугар күрэс буолла. Манна биэс оҕо кытынна. Маны кииннэммит бибилэтиэкэ информационнай отделын үлэһиттэрэ сыаналаатылар.
Экспертэр биир күнү анаан туран үлэлэри барытын кичэйэн ааҕан, 5 критерийинэн сыаналаан бастыҥ үлэлэри таллылар.
Үөрэнээччилэргэ кыайыылаахтарынан буоллулар:
1 м. – Иванов Николай, Кутана оскуолата, салайааччы – Тамара Иванова, Ли Стас, Семенова Анисия, А.П.Павлов аатынан Сунтаар 1 №-дээх оскуолата, салайааччылара – Тамара Степанова. 2 м. – Иванова Валентина, Элгээйи оскуолатын үөрэнээччитэ, салайаччыта – Саргылаана Алексеева уонна Тоглакпан Менди, Хоро оскуолатын үөрэнээччитэ, салайааччыта – Лариса Илларионова. 3 м. – Сунтаардааҕы политехническай лиссиэйин 11 «в» кылааһын үөрэнээччилэрэ, Кривошапкина Карина, Ксенофогнтова Аэлита, салайааччылара – Мария Григорьева.
Оттон улахан дьоҥҥо кыайыылаах үрдүк аатын Сунтаартан Марианна Семенова, иккиһи Августина Попова (Сунтаар), үсүһү Маар Күөлтэн Олимпиада Петрова ыллылар.
Видеокиинэ, ролик устуутугар Л.А.Попов аатынан Арыылаах агро хайысхалаах оскуолатын үөрэнээччитэ Иванов Ян бастакы миэстэни ылла. Оттон А.К.Акимов аатын сүгэр Күүкэй орто оскуолатын 8-с кылааһын үөрэнээччилэрэ иккис миэстэ буоллулар. Үһүскэ эмиэ бу оскуола үөрэнээччитэ Федорова Сулустаана таҕыста.
Улуус бибилэтиэкэрдэрэ этэллэринэн, маннык хабааннаах дакылааттар таһымнара сыл аайы үрдээн, кыттааччыта элбээн иһэр эбит. Үчүгэй дакылааттары талан буклет, кинигэ таһаарабыт диэн бибилэтиэкэрдэр салайааччылара Изабелла Жиркова кэпсээтэ.
Яина ВЛАСЬЕВА