Бастаан оскуолаҕа үлэлии кэлбит эдэр учуутал идэҕэ уһуйуллуутугар элбэх тургутууну ааһар. Маныаха кинилэргэ аҕа сүбэһит биир идэлээхтэрэ күүс-көмө, өйөбүл-тирэх буолаллар.
Үөрэх эйгэтин эдэр үлэһиттэригэр уонна кинилэр аҕа сүбэһиттэригэр «Опыт — самый лучший наставник» диэн улуустааҕы семинар ыытылынна. Манна улуус оскуолаларыттан эдэр учууталлар бэйэлэрин наастабыньыктарын кытта кэлэн уопут, билии атастастылар араас маастар кылаастарга сырыттылар. Сунтаар 3№-дээх оскуолатын омук тылын учуутала А.Н.Николаева эдэр учууталларга үлэҕэ көрсөр ыарахаттары аҕа сүбэһит көмөтүнэн хайдах туоруохха, онтон кини ыйыытынан-кэрдиитинэн, сүбэтинэн ситиһиигэ кэлиэххэ сөбүн оонньуу көмөтүнэн көрдөрдө.
Үөрэх эйгэтигэр баай уопуттаах 45 сыл ыстаастаах Тойбохой оскуолатын алын сүһүөх кылааһын учуутала Жетта Николаевна Инокентьева: «Аҕа сүбэһит учуутал быһыытынан үлэлээбитим ыраатта. Билигин Анна Борисовна диэн үлэлээбитэ саҥа 3 сылыгар барбыт эдэркээн учуутал кыыска настаабыньык быһыытынан сылдьабын. Саҥа оҕолору кытта үлэлээн эрэр киһиэхэ аҕа сүбэһит көмөтө хайаан да наада. Аҕа сүбэһит эдэр учуутал оҕолору кытта биир тылы буларыгар, докумуон үлэтигэр, уруоктарын сөпкө наардаан ыытарыгар көмө-тирэх буолар. Онтон эдэр оҕолор аҕам саастаах киһиэхэ үөрэх аныгы ньымаларын туттууга көмөлөһөллөр. Онон хардарыта көмөлөөн оҕолору сырдыкка, кэрэҕэ уһуйабыт».
Мария Алексеевна Трофянова, Күндэйэ оскуолатын технология учуутала: «Арнольд Алексеевич Меняков диэн төрүт култуура үөрэхтээх эдэр технология учуутал миэхэ сыстан үлэлиир. Иккиэн «Сайылык- саха киһитин эйгэтэ» диэн бырайыагы үлэлэтэ сылдьабыт. Настаабыньык быһыытынан үлэлээбит оҕолорум билигин бэйэлэрэ учууталлыы сылдьалларын көрөн үөрэбин. Ол аата мин сөптөөх суолунан оҕолору ыыппыт эбиппин».
Алена Алексеевна Сергеева Сунтаардааҕы гимназияҕа музыка, саха тылын учуутала бэйэтэ соторутааҕыта эдэр учуутал этэ билигин номнуо настаабыньык быһыытынан эбии үөрэхтээһин педагогар Сайаана Артемовна Васильеваҕа күүс-көмө буолар: «Мин Сайаана Артемовнаны оскуолаҕа үөрэнээччим этэ. Билигин үөрэх эйгэтигэр биир идэлээҕим буолбутуттан олус үөрэбин. Бэйэм аҕа сүбэһит быһыытынан бастакы хараҥаччым буолар. Онон ис дууһабыттан кини үөрэх эйгэтигэр тирэхтээх буоларыгар кыһаллабын. Сайааналыын биһиги чугас дьүөгэлии да буоллубут диэн этэр кыахтаахпын. Эдэр учууталларга үлэҕэ айымньылаахтык сыһыаннаһыҥ, оччоҕо оҕолор эһиэхэ сыстыахтара уонна тардыһыахтара диэн сүбэлиибин».
Мира АФАНАСЬЕВА
