Ыччаты олох киэҥ аартыгар сирдиир үөрэх кыһата

Биһиги улууспутугар биир киэн туттар анал орто үөрэхтээһин кыһата — Сунтаардааҕы технологическай колледж буолар. Колледж дириҥ историялаах, үгүс талааннаах, киэҥ билиилээх педагогтар үлэлээн, манна улууспут элбэх эдэр ыччата үөрэнэн, идэ ылан ааспыттара. Ол курдук кинилэр истэригэр Арассыыйа дьоруойдара Филипп Евсеев уонна Дмитрий Егоров бааллар.

Колледжка билигин үөрэх 9 хайысханан тэриллэн, барыта 183 устудьуон үөрэнэр.
Ол курдук, «Электромонтер по ремонту и обслуживанию электрооборудований», «Оператор нефтяных и газовых скважин», «Машинист дорожных и строительных машин» «Слесарь-наладчик контрольно-измерительных приборов и автоматики», «Ювелир, «Повар, кондитер», «Монтаж, наладка и эксплуатация промышленных и гражданских зданий», «Мастер по ремонту и обслуживанию автомобилей» уонна «Информационные системы и програмирование» идэлэргэ устудьуоннар үөрэнэллэр.

Бу сылга, дойду Аҕа баһылыга Владимир Путин сорудаҕынан «Президентская единая субсидия» бырагыраама чэрчитинэн , «Обслуживание грузовой техники», «Управление бульдозером» уонна «Управление экскаватором» диэн үс мастарыскыай үлэҕэ киирбитэ. Саҥа мастарыскыайдарга устудьуоннар дьиҥнээх үлэ усулуобуйаларыгар практика ааһан, үөрэх бүтүүтүгэр үлэҕэ бэлэм квалифицированнай идэлээх үлэһит буолан тахсалларыгар кыах баар буолла.

Итини таһынан, A,B,C,D,CE категорияларга колледжка суоппардары үөрэтэллэр. Кэлиҥҥи кэмҥэ олох сайдан, массыына ыытар уонна ыытарга үөрэнэр баҕалаах дьон ахсаана элбээтэ, бүгүҥҥү олох ирдэбилэ буолла.

Үөрэнэргэ усулуобуйа барыта тэриллэн, нэһилиэктэртэн кэлбит устудьуоннар уопсайга олороллор. Ону сэргэ 18 саастарын туола илик, тулаайах эбэтэр элбэх оҕолоох уонна анал байыаннай дьайыы кыттыылаахтарын дьиэ кэргэттэриттэн үөрэнэр устудьуоннарга остолобуойга күҥҥэ 3-тэ босхо аһыыллара көрүллэр.

Колледж преподавателлэрэ сыл аайы араас курстары ааһаан, бэйэлэрин билиилэрин хаҥатыналлар, таһымнарын үрдэтинэллэр.

Сунтаар тэрилтэлэрин кытта бииргэ үлэлэһэ турар, ол курдук «Алмазэргиэнбанк» үлэһиттэрэ устудьуоннарга харчыны сөпкө туттарга, дьиэ кэргэн бүддьүөтүн ааҕарга-суоттуурга, былаанныырга, харчыны мунньарга, уурунарга, кирэдьиити, ипэтиэкэни түргэнник сабарга үөрэтэллэр, оттон «Сунтарцеолит», «Сунтаравтодор», «Айан-Суол», «Дабаан-Строй», «ОДьКХ», «Жилкомсервис» тэрилтэлэрэ устудьуоннар практикаларын ааһалларыгар үлэлэһэллэр.

Ол курдук, Сунтаарбыт колледжа аныгы үөрэх стандартарыгар эппиэттээн,
инники кэмнэргэ өссө күүскэ сайдан, аныгы олоҕу кытта тэҥҥэ хардыылаан, сайдыы устун эрэллээхтик үлэлээн, элбэх ыччат саҥа идэлэри баһылыылларыгар уһуйан, үрдүк ситиһиилэри ыла туруоҕа диэн эрэнэбит.

Дмитрий ЫМЫЧАНОВ

Читайте дальше