Бүгүн СӨ психологическай киинин Сунтаардааҕы филиала 15 сыллаах үбүлүөйүн бэлиэтиир бэлиэ түгэнэ буолла. Нэһилиэнньэ уйулҕата бөҕөх буоларыгар туһуламмыт үлэни ыытар Сунтаардааҕы филиал 2009 с. арыллыбыт. Билигин филиалга старшай психологунан Александра Попова, старшай психолог солбуйааччыта Татьяна Антипина, социальнай педагог Алена Павлова үлэлии-хамсыы сылдьаллар.
Аныгы кэмҥэ киһи ис туруга, уйулҕата айгырыыр кыахтаах кэмигэр үөрэхтээх психолог өҥөтө олус туһалаах. Психологтар анал байыаннай дьайыы кыттыылаахтарыгар уонна дьиэ кэргэттэригэр ону таһынан нэһилиэнньэҕэ психологическэй өҥөнү оҥороллор. Кинилэр дьиэ кэргэн боппуруоһугар, улаатан эрэр оҕолорго, ыарахан түгэҥҥэ түбэспит дьоҥҥо өйөбүл, көмө буолаллар. Маны сэргэ биирдиилээн консультациялары, диагностикалары, араас трениннары, сэминээрдэри ыыталлар.
Филиал үбүлүөйдээх тэрээһинигэр ыкса ситимнээхтик үлэлэһэр тэрилтэлэр кэлэн эҕэрдэ, махтал тылларын эттилэр, сэмэй бэлэхтэрин туттардылар. Инникитин да ситиһиилээх үлэни баҕардылар.
Алена ИВАНОВА