Ааспыт сылга «Алмазэргиэнбанк» акционернай тэрилтэ корпоративнай волонтердарын ортотугар куонкурус ыыппытыгар, баан Сунтаардааҕы допофиһыттан Эллада Николаева уонна Арианна Кондратьева кыайыылаах буолан граҥҥа тиксибиттэрэ. Үбү-харчыны сөптөөхтүк, табыгастаахтык туттууга үөрэтэр тэрээһини «Алмазэргиэнбаан» үлэһиттэрин кытары улуустааҕы дьахтар сэбиэтэ ууонна «Арассыыйа ийэлэрэ» түмсүү тэрийсэн ыыппыттара.
Холобур, ахсынньы ый саҕаланыыта «Алмазэргиэнбанк» АО уонна Сунтаардааҕы технологическай колледж финансовай үөрэхтээһин чэрчитинэн ыыппыт «Дьиэ кэргэн бүддьүөтэ» диэн кыттыгас бырайыактарынан «Бэйэ дьыалатын тэринии» диэн олус сэргэх көрсүһүү буолбута. Бу бырайыагы олоххо киллэриигэ «Алмазэргиэнбанк» юридическай сирэйдэри кытта үлэлэһэр группа салайааччыта Арианна Кондратьева уонна Сунтаардааҕы технологическай колледж дириэктэрин үөрэх чааһыгар солбуйааччы Марианна Попова, үп-харчы үөрэҕэр уонна экономика сүрүн төрүттэригэр уһуйааччы Д.В. Трофимова үлэлэспиттэрэ.
«Бэйэ дьыалатын тэринии» тэрээһиҥҥэ устудьуоннар икки ардыларыгар күрэс, ону сэргэ финансовай билиигэ-көрүүгэ преподавателлэр уонна устудьуоннар ортолоругар биктэриинэ буолбута.
Бу күн устудьуоннар бэйэ дьыалатын арыйыыга бииисинэс-толкуйдара көрүллүбүтэ. Манна эксперт быһыытынан «Мин биисинэһим» киин Сунтаардааҕы филиалын салайааччыта Александра Иванова, Сунтаар нэһилиэгин олохтоох дьаһалтатын ыччаты кытары үлэҕэ уонна успуорду сүрүннүүр исписэлииһэ Людмила Тертюхова, «Виктория» маҕаһыын салайааччыта Иван Герасимов үлэлээбиттэрэ.
Маннык тэрээһин, үөрэх ыытыллара билиҥҥи кэмҥэ олус көдьүүстээҕин манна сылдьыбыт эрэ барыта бэлиэтээн этэр. Финансовай үөрэх кэмигэр дьиэ кэргэн бүддьүөтүн ааҕыныы-суоттаныы, эбии дохуоту киллэриигэ туох дьаһаллары ылыахха сөбүн, харчыны табыгастаахтык туттууга элбэх сүбэни-аманы биэрдилэр. Ону сэргэ билигин дьон харчытыгар дуораһыйар түөкүттэр албастарыгар киирэн биэрбэт туһугар туоҕу гыныллыахтааҕын, сэрэхтээх буолары, оҕоҕо, кырдьаҕаска мэлдьи этэ, үөрэтэ сылдьар наадатын быһааран биэрдилэр.
«Алмазэргиэнбанк» Сунтаардааҕы допофиһын салайааччыта Эллада Николаева нэһилиэнньэҕэ, эдэриттэн аҕам саастаахтарыгар тиийэ хабан улуустааҕы кииннэммит бибилэтиэкэҕэ финансовай үөрэҕи ыыппыттара. Ону таһынан маннык көрсүһүүлэр Кириэстээххэ, Күндэйэҕэ, Күүкэйгэ, Толооҥҥо, Кутанаҕа, Элгээйигэ, Сиэйэҕэ эмиэ буолбута.
Үбү-харчыны сөпкө туттууга үөрэтэр тэрээһиҥҥэ көхтөөхтүк кыттыбытттарга баан логотиптаах уруучукалар, блокноттар бэлэх туттарыллыбыттара.
Нэһилиэнньэҕэ олус туһалаах үөрэҕи быйыл эмиэ ыыталлара буоллар диэн «Алмазэргиэнбанк» Сунтаардааҕы филиалын үлэһиттэригэр дьон баҕа санаатын тириэрдэр.
Яина ВЛАСЬЕВА