Сунтаардааҕы киин балыыһа үлэһиттэрэ ыарыыны эрдэттэн сэрэтэр, тохтотор инниттэн диспансеризация үлэтин нэһилиэнньэҕэ күүскэ ыыталлар.
Ыарыыны кэтээн көрүүгэ кэлиҥҥи кэмҥэ дойду үрдүнэн болҕомто ордук күүһүрдэ. Бэл диэтэр, РФ Үлэ Кодексатын 185.1 ыстатыйатыгар олоҕуран, үлэ биэрээччи үлэһитигэр диспансеризацияны ааһарыгар төлөбүрдээх биир өрөбүл күнү биэрэр эбээһинэстээх. Маны сэргэ, диспансеризацияны 40-тан үөһэ саастаах дьон сыл аайы барыахтаахтар.
Бу күннэргэ, көһө сылдьан үлэлиир эмчиттэр биригээдэлэрэ (терапевт быраас Антонина Гаврильева, профилактика кэбиниэтин бырааһа Марина Андреева, сиэстэрэлэр Валентина Ващенко, Светлана Максимова, Матрена Сидорова, Ксения Иванова, Мария Максимова) былаан быһыытынан олох-дьаһах коммунальнай хаһаайыстыба үлэһиттэригэр диспансеризация бастакы түһүмэҕин оҥордулар. Манна 55 үлэһит доруобуйатын көрдүлэр-иһиттилэр. Ол курдук, хаан анаалыһын ыллылар, харах дабылыанньатын кээмэйдээтилэр, ЭКГ түһэрдилэр уонна спирография көмөтүнэн тыынар уорган систиэмэтин бэрибиэркэлээтилэр. Биригээдэ үлэһиттэрэ аны, Толстой, Аллыҥа уонна Хадан нэһилиэктэигэр тахсан үлэлиэхтэрэ.
Улууспутугар быйылгы сылга диспансеризацияны 2007, 2004, 2001, 1998, 1995, 1992, 1989, 1986 сыл төрүөхтэр, ону тэҥэ профосмотрга 2006, 2005, 2003, 2002, 2000, 1999, 1997, 1996, 1994, 1993, 1991, 1990, 1988, 1987 сыл төрүөх дьон ааһыахтаахтар.
Хас биирдии киһи бэйэтин доруобуйатын кэмиттэн кэмигэр көрдөрүнэ сырыттаҕына эрэ, ыарыыны сэрэтэр, тохтотор кыахтаах.
Елизавета ТИТОВА