Ыал аҕата ону таһынан үлэһит бастыҥа, холобур буолар ирдэбиллээх салайааччы. Кини тиритэ-хорута үлэлии сылдьара, дьонун-сэргэтин туһугар кыһаллара, бу дьалхааннаах кэмҥэ халыҥ хахха, суон дурда буолара — дьахтар дьоло, ыал кэскиллээх түһэ, тэрилтэ бөҕө тирэҕэ!
Биир итинник түгэн туһунан Дьокуускайга хорсун, хоодуот үлэ киһитин туһунан дьоһун кинигэ бэчээттэнэн күн сирин көрдө. Ол биир дойдулаахпыт, Күүкэй сириттэн төрүттээх, Сунтаар улууһун, Элгээйи уонна Күүкэй нэһилиэктэрин Бочуоттаах олохтооҕо, СӨ тыатын хаһаайыстыбатын үтүөлээх үлэһитэ, СӨ тыатын хаһаайыстыбатын уонна олохтоох бырамыысыланнаһын туйгуннарын, СӨ тыатын хаьаайыстыбатын бэтэрээнин Прокопий Степанович Акимов «Олоҕум үлэнэн хардыылаабыт суола» диэн кинигэтэ.
Мин Прокопий Акимовы кытта ыаллыы нэһилиэккэ төрөөбүт уонна биир көлүөнэ дьоно буоларбыт быһыытынан кини олоҕун, үлэтин кэрдиистэрин добуочча билэбин дии саныыбын. Айбыт аҕата Степан Максиимович, дьэ, кырдьык, сытыы-хоту, туохтан да иҥнэн-толлон, саараан турбат хоһуун, хоодуот майгылаах быһыылааҕа. Дэлэҕэ, «Ыстахаанабыс Ыстаппаан» диэн ааты ылыа дуо?! Кини ханнык баҕарар хара үлэҕэ ураты кыайыгаһын, сатабылын бэлиэтииллэрэ. Ол курдук, 17 эрэ саастаах эдэр уол от охсуутугар Буускап хотуурунан 2,5 га сири охсон куһуйбут.
Прокопий Степановичка үлэһитин өттүнэн «Ыстахаанабыс» хаачыстыбалара, холобурдара бары бааллар дии саныыбын.
Прокопий Акимов олоҕун үлэнэн хардыылаабыт суоллара кырдьык, уратылар этэ. Кини туруорумммут сыалын- соругун толорор туһугар туохтан да иҥнибэт булгуруйбат буулаҕа күүстээҕэ. Эрэдээксийэҕэ үлэлиир эрдэххэ араас таһымнаах мунньахтарга син сылдьыллара. Онно Прокопий Акимов тыл этиитэ, туруорсуута хайаан да сэргэхсийиини, сэҥээриини үөскэтэрэ. Кистэл буолбатах, кини үгүс салалта этиитин кытта барытын сөбүлэһэн, куоластыырга сорохтор курдук «үһүс илиитин» көрдөнө олорор салайааччы буолбатах этэ.
Биллэн турар, мин бу кинигэни барытын ырыта сатаабаппын , онно кыаҕым да суох. Ол эрээри, бу дьоһуннаах кинигэни аһара астына, сөбүлүү көрдүм. Оо, Борокуоппай обургу чахчы уол оҕо үс кырыылааҕа буоллаҕа!
Бу дьоьун кинигэни булан ааҕа сатааҥ.
Үлэ киһитин туһунан сонун суруйуулардаах бэртээхэй кинигэни эмиэ биир дойдулаахпыт, Саха сирин билиҥҥи кэмин биир улахан суруналыыһа Милан Афанасьев киһи эрэ аахтар ааҕа олоруон курдук ситэрсэн-хоторсон биэрбит.
Дьэ, Саха сирин биир бастыҥ дьиэ кэргэнин аҕатын туһунан «Олоҕум үлэнэн хардыылаабыт суола» диэн Прокопий Акимов кинигэтин аахтаххытына бэрт элбэҕи билиэххит дии санаатым.
Борис НИКОЛАЕВ