Василий Федотов аатынан өрөспүүбүлүкэтээҕи хапсаҕай күрэхтэһиитэ ыытыллыаҕа

Олунньу 8-9 күннэригэр Сунтаарбытыгар хапсаҕайдьыттар күөн көрсөр түһүлгэлэрэ тэриллиэҕэ. Күрэхтэһии тыыл, үлэ бэтэрээнэ, Саха АССР норуоттарын 1960 с. III Спартакиадаларын хапсаҕайга боруонса призера, «Урожай» ДСО Уобаластааҕы Сэбиэтин 1961 с. чөмпүйүөнэ Василий Данилович Федотов кэриэһигэр ыытыллыаҕа. Бу күрэхтэһии сүрүн уратытынан «А» категориялаах ол эбэтэр маастар нуорматын толоруулаах буолар. Манан сиэттэрэн бүгүн олунньу 4 күнүгэр улуус дьаһалтатын аактабай саалатыгар күрэхтэһии тэрээһинин туһунан сүбэ мунньах буолла. Мунньаҕы улуус баһылыга Анатолий Григорьев салайан ыытта. Бу сылга улууспутугар бастакы өрөспүүбүлүкэтээҕи күрэхтэһии үрдүк таһымҥа ыытылларыгар тустаах тэрилтэлэргэ бэлэмнэнии үлэтэ бара турарын иһитиннэрдилэр. Спортсменнар түһэр сирдэрин, кэлэр-барар суолларын, ас-үөл о.д.а. кэккэ боппуруостары быһаарыстылар.
Кыттааччылар маннык категорияҕа арахсан күрэхтэһиэхтэрэ: уолаттар (2007 с.т., онтон эдэрдэр) 50 киилэ, 55, 62, 70, 70 үөһэ, эр дьон (2006 с.т.,онтон улахан) 57, 65, 75, 85, 95, 95 үөһэ, бэтэрээннэр (1985 с. т, онтон улахан) 60, 70, 80, 80 үөһэ ыйааһыннарга. Биирдиилээн бастыыр иһин абсолютнай күрэхтэһии 2007 с. онтон эдэр уолаттарга, эр дьоҥҥо 2006 с.т., онтон улахан 75 кг диэри, 75 кг үөһэ уонна бэтэрээннэргэ 1985 с.т. онтон үөһэ.
Бириис уопсай пуондата 1 мөлүйүөн. Ол курдук, абсолютнай чөмпүйүөннэргэ эр дьоҥҥо 75 киилэҕэ диэри – 100 тыһ. солк., 75 киилэттэн үөһэ — 100 тыһ.солк., бэтэрээннэргэ 1985 с. онтон үөһэ — 50 тыһ.солк., уолаттарга 2007 с. онтон кыраларга — 30 тыһ.солк. наҕараадаланыахтара.

Алена ИВАНОВА

(хаартыска интэриниэт ситимиттэн)

Читайте дальше