Урбаанньыт Надежда Львова: Ил Дархан Айсен Николаев болҕомтону биһиги диэки туһаайбыта олус үчүгэй

Урбаан эйгэтигэр таһаарыылаахтык үлэлии турар «Корона» фирма салайааччыта, Сунтаар улууһун Уопсастыбаннай Сэбиэтин бэрэссэдээтэлэ, Аҕа дойдуну көмүскээччилэр дьиэ кэргэттэрин кэмитиэтин чилиэнэ Надежда Львова Ил Дархан Айсен Николаев былаас уонна урбаан эйгэтэ сибээһин күүһүрдүөхтээҕин туһунан анал этиитин сэҥээрэ иһиттэ:

«Айсен Николаев СӨ бырабыыталыстыбатыгар урбааны кытары аһаҕас, чиэһинэй кэпсэтиини олохтуурга олус үчүгэй соругу туруорда. Бэйэм бу эйгэҕэ үлэлэһэ сылдьар киһи буоларым быһыытынан уонна атын урбаанньыттары кытары тирээн турар кыһалҕалары, уустуктары быһаарсарга эрдэ эмиэ куйаар ситимнэргэ туруорсар этибит. Билиҥҥи кэмҥэ балаһыанньа олус уустук, кэлэр сылга өссө ыарахан буолара буолуо. Ол курдук, сүрүн кыһалҕабыт нолуок уонна үлэ сокуонугар, итиэннэ атыы-эргиэн быраабылаларыгар уларыйыылар киириилэрэ буолар. Ити, нэһилиэнньэни аһынан-үөлүнэн, наадалаах табаарынан хааччыйан олорор орто уонна дьоҕус урбаан үлэһиттэригэр охсуулаах буолан тахсар. Маны сэргэ, уматыкка, уот төлөбүрүгэр о.д.а. сыана үрдүү турар буолан, килиэп астааһыныгар, бурдук аҕалааһыныгар улахан күчүмэҕэйдэри көрсөбүт. Биһиги бурдукпутун «Якутоптторг» тэрилтэттэн атыылаһабыт. Бу тэрилтэ эрдэ улууспутугар баар эбит буоллаҕына, билигин Ньурба улууһугар көһөн улахан мэһэйдэри көрсөн олоробут.
Ол да буоллар, олох ыллыгын устун тэҥҥэ хардыылаһан иннибит диэки баран иһиэххэ наада. Билигин санкциянан сибээстээн бэйэ оҥорон таһаарар бородууксуйаҕа ылсан үлэлээччи да элбээтэ. Холобура кондитерскай астары бэйэбит астаан таһаарар буоллубут. Олохтоох дьону бэйэ сибиэһэй, хаачыстыбалаах аһынан хааччыйабыт. Саамай сүрүнэ, хайа баҕарар урбаанньыт хаачыстыбаҕа эппиэттэһэр гына үлэлиэхтээх.
Түмүккэ, өрөспүүбүлүкэбит Ил Дархана Айсен Николаев болҕомтону биһиги диэки туһаайбыта олус үчүгэй. Хас биирдии урбаанньыт интириэһин көмүскээн, былаас өттүттэн өйөбүл баара наада.»

Читайте дальше