Оруобуна 55 сыл анараа өттүгэр 1969 сыллаахха, балаҕан ыйын 1 күнүгэр оҥой-соҥой көрбүт кырачаан дьоннор оскуола боруогун аан маҥнай атыллаан чуораан чугдаарар тыаһын иһиллээн турбуппут. Учуутал диэн сүдү киһини кытта сиэттиһэн билии-көрүү дойдутугар үктэммиппит. Ити курдук олохпут биир умнуллубат бэлиэ кэрдиис кэмэ саҕаламмыта.
Сааһыран истэхпит аайы оскуолатааҕы оҕо сааспыт кэмнэрэ харахпытыгар олус истиҥник көстөн ааһара барыбытын долгутар. 10 сыл бииргэ үөрэммит эн-мин дэһэн улааппыт күндү үөлээннээх доҕотторбутун кытта көрсүһүү ураты истиҥ-иһирэх буолар диэн ыраахтан-чугастан муһуннубут.
1979 сыллаахха П.Х.Староватов аатынан Элгээйи орто оскуолатын 89-с буолан үс кылааһынан ( А , Б, В ) бүтэрбиппит. Ситии-хотуу аттестатын тутан үгүстэр “Школа-Производство-ВУЗ” бачыымы өйөөн төрөөбүт нэһилиэктэригэр сопхуоска араас араҥаҕа үлэлии хаалбыттара. Сорохтор үрдүк, орто үөрэх кыһатыгар үөрэнэ киирбиттэрэ. Ити курдук, хас биирдиибит иннигэр олох киэҥ суола аһыллан дьиэ-уот тэринэн, араас идэни баһылаан, Саха сирин араас муннуктарыгар, сорохтор төрөөбүт дойдуларыгар олохсуйан сайаҕас эбээ, истиҥ эһээ аатын сүгэн быр-бааччы олоробут.
Биһикпитин ыйаабыт Элгээйибитигэр оскуоланы бүтэрбиппит 45 сылын үс түһүмэҕинэн бэлиэтээн көрсүһүүбүт олус ураты уонна истиҥ буолла. Ыам ыйын 24 күнүгэр оскуолаҕа “Тиһэх чуораан” тэрээһиҥҥэ “Выпуск-1979 “диэн лента кэтэн үөрүүлээх илиниэйкэҕэ кытынныбыт. Быйыл оскуоланы бүтэрэр оҕолорго анаан кылаас чааһын ыыттыбыт, өйдөбүнньүк бэлиэлэри туттардыбыт. Ону таһынан, үөрэххэ, успуорка, уопсастыбаннай үлэҕэ ситиһиилээх Лилия Поротоваҕа, Семен Макаровка, Варя Мироноваҕа хас биирдии кылаас аатыттан стипендия туттардыбыт. Оскуола остолобуойугар итии чэйдээх остуол тардыбыттар, олохтоох бибилэтиэкэ оҕо сааспытын санатар интэриэһинэй викторина тэрийэн ыытта. Оскуола кэлэктиибэ, чуолаан салайааччы София Васильевна Миронова, олус истиҥ-иһирэх көрсүһүүнү тэрийбитэ. Биһиги үөрэммит оскуолабыт эргэрэн турар. Билигин саҥалыы киэҥ-сырдык оскуола уораҕайа тутуллан киһи көрөн эрэ үөрэр.
Көрсүһүүбүт иккис түһүмэҕэ нэһилиэк уйгу-быйаҥ ыһыаҕа буолла. Бу да сырыыга нэһилиэкпит дьонугар үтүө өйдөбүлү хаалларар сыаллаах икки кылаас ( А уонна В ) кыттыһан “Үрүҥ Уолантай “диэн 18-гар диэри саастаах уолаттар күрэхтэригэр харчынан бирииһи туруордулар. 1-кы миэстэҕэ 15 000, 2-с миэстэҕэ 10 000, 3-с миэстэҕэ 5 000 солк. Нэһилиэк олохтоохторо махталлара, үөрүүлэрэ муҥура суох.
Көрсүһүүбүт үһүс түһүмэҕэр өйдүү-саныы сылдьар курдук оскуолабыт иннигэр аныгылыы флешмоб үҥкүүлээн үйэтиттибит. Кыра сааспытыттан көрүлээн сынньанар үрүҥ тунах ыһыах ыһыллар Угут Күөл сиригэр тиийэн оонньоотубут-көрүлээтибит. Хас биирдии бэйэбит анал ааттар хаһаайыннара буолан доҕотторбут бэлэмнээбит бэлэхтэрин туттубут. Сергей Ефремов дьиэ кэргэнэ спортивнай ытыыга күрэх тэрийэн соһутта. Кыайыылаахтарга туруорбут бириистэрин туттарда. Икки хамаандаҕа арахсан көрдөөх стартар олус эрийсиилээхтик ыытылыннылар. Түмүгэр доҕордоһуу кыайда. Араас интэриэһинэй остуол оонньуулара оонньоннулар, тэтимнээх үҥкүүлэр үҥкүүлэннилэр.
Ити курдук, оскуоланы бүтэрбиппит 45 сылын өрө көтөҕүллэн туран атаардыбыт, бары дуоһуйа сынньанныбыт, өссө да көрсүһүөх буолан тарҕастыбыт.
Түгэнинэн туһанан, биһиги ыраахтан кэлбит ыалдьыттар олохтоох доҕотторбутугар барҕа махталбытын тириэрдэбит. Ону таһынан, бу тэрээһини тэрийэргэ сүүрбүт-көппүт үтүө доҕотторбутугар Сергей Петрович Ефремовка, София Васильевна Мироноваҕа, Алла Прокопьевна Евсееваҕа, Наталья Семеновна Денисоваҕа, Евдокия Николаевна Романоваҕа истиҥтэн-истиҥ махтал тылларын аныыбыт.
Көрсүөххэ диэри!
АЛЛА ЕВСЕЕВА