Бу орто туруу бараан дойдуга ыал буолан олоруу, оҕо-уруу төрөтөн удьуору тэнитии үрдүк дьол, олоххо ситиһии буолар. Дьиэ кэргэн уопсастыба биир тутаах кэрчигэ, элбэх оҕону иитии, үөрэттэрии, атахтарыгар туруоран уопсастыбаҕа туһалаах дьон буолалларын ситиһии — ийэ, аҕа сырата, кыһамньыта.
Сунтаар нэһилиэгэр 50 сыл уонна онтон уһуннук сүрэхтэрин сүбэтинэн бииргэ олорор ыал элбэх. Кинилэри чиэстиир-бочуоттуур үтүө үгэстээхпит.
Ол курдук, ахсынньы 25 күнүгэр Иванов Вячеслав Егорович уонна Мохначевская Антонида Владимировна дьиэ кэргэттэрин, оруобуна ыал аҕа баһылыга 80 сааһын туолар дьоро күнүгэр сөп түбэһиннэрэн, Сунтаар улууһун Кыһыл көмүс кинигэтигэр 347 нүөмэринэн үөрүүлээх быһыыга-майгыга сурулуннулар, чугас дьоннорун ортотугар сэмэйдик бэлиэтээтилэр.
Оттон бу аҕыйах хонуктааҕыта «Партизан» НАТК Арассыыйаҕа Дьиэ кэргэн, улууска Аҕам саастаахтарга сүгүрүйүү сылларын чэрчитинэн, бииргэ олорбуттара үйэ аҥаардаах үбүлүөйдэрин бэлиэтиир Фекла Ивановна, Андрей Дмитриевич Андреевтар үрдүк сыанаҕа чиэстэннилэр. Ол туоһута уостубат, үйэлээх тапталларын өссө биирдэ бигэргэтэн Кыһыл көмүс кинигэҕэ 348 нүөмэринэн сурулуннулар. Олохторун уһун кэмигэр олорбут, үлэлээбит улуустарын, нэһилиэктэрин ааттарыттан эҕэрдэ эриэккэһин, махтал барҕатын туттулар, өрөспүүбүлүкэбит сайдарыгар киллэрбит кылааттарын иһин Ил Дархантан Махтал сурук, «Дьиэ кэргэн килбиэнэ» бэлиэни туттулар. Ону тэҥэ нэһилиэккэ маҥнайгынан тэриллибит «Алгыс» уопсастыбаннай түмсүү ыалынан көхтөөх кыттыылаахтара 56 сыл бииргэ олорбут – Валерия Макаровна, Иван Петрович Егоровтар, 44 сыл бииргэ олорбут – Зинаида Николаевна, Ефрем Николаевич Афанасьевтар, 40 сыл бииргэ олорбут – Евдокия Николаевна, Николай Николаевич Егоровтар уонна 39 сыл бииргэ олорбут – Надежда Петровна, Ефим Николаевич Тартаковтар истиҥ эҕэрдэ туттулар, чиэстэннилэр.
Светлана ЕГОРОВА, хаһыат уопсастыбаннай кэрэспэдьиэнэ