Улуустааҕы быһыыр сулууспа көҕүлээһининэн (салайааччы Артем Яковлев), Сунтаардааҕы Ис дьыала иһинэн суолга куттал суох буолуутун государственнай инспекцията уонна Сунтаардааҕы технологическай колледж бииргэ үлэлэһиилэринэн Устьеҕа «Спасатель» лааҕыр Устьеҕа аһыллан үлэлиир. Манна улууспут нэһилиэктэриттэн 14 саастарыттан үөһэ саастаах, барыта 23 уол оҕо лааҕырга кэлэн үөрэнэ сылдьар. Лааҕырга сылдьыбыт уолаттар түмүккэ «А» категорияҕа права ыларга ыспыраапка ылаллар.
Лааҕыр быыһааччы идэтин сыныйан билии, ыксаллаах быһыыга тугу гынарга, бастакы суһал көмөнү хайдах оҥорорго оҕолору үөрэтэр, билиҺиннэрэр сыаллаах аһыллан үлэлииир.
Бу күннэргэ Аҕа сүбэтэ лааҕырга сылдьан оҕолор хайдах олороллорун, лааҕыры төһө сөбүлээбиттэрин, инники туох былааннаахтарын билистэ, уолаттарга араас хайысхалаах бэсиэдэ ыытта. Ол курдук, билиҥҥи уустук кэмҥэ, Ийэ дойдуга бэриниилээх буолуу, уопсастыбаҕа, бэйэҥ төрөөбүт дойдугар өй-санаа, эт-хаан өттүнэн эргиччи сайдыылаах, туһалаах киьи буоларга, аҕа саастаах кырдьаҕастарбытын ытыктыырга, тулалыыр эйгэни харыстыырга о.д.а. кэпсэтии ыытылынна.
Маны таһынан хас биирдии уол төрөппүттэрин, убайдарын, эҺэлэрин кытта булка-алка сылдьаллара баар суол. Онно хас саастарыттан сааланыахтарын, онно туох ирдэнэрин барытын сиһилии Росгвардия, лизенциялыыр-көҥүллүүр үлэ отделын старшай инспектора Афанасий Федоров уолаттарга билиһиннэрдэ. Доруобуйа харыстабылын бэтэрээнэ Константин Рожин уол оҕо эт-хаан өттүнэн сайдыахтааҕын, табах буортутун, атын да куһаган дьаллыктан туора турарга, араас аныгы гаджеттары сөпкө туттарга уо. д.а. күүннээҕи олоххо көрсөр тиэмэлэргэ бэрт интэриэҺинэй сүбэлэри биэрдэ.
Түмүккэ уолаттар мунаахсыйар, интэриэһиргиир ыйытыыларын биэрэн, сөптөөх хоруйдары ыллылар. Бу күн тэрээһиниттэн бары астынан таргастыбыт.
Улуустааҕы Аҕа сүбэтэ