Бүгүн, кулун тутар 12 күнүгэр, Дьокуускай куоракка үөрүүлээх быһыыга-майгыга Ил Дархан Айсен Николаев улуустарга 29 автобус күлүүһүн туттарда. Бу техникалар Арассыыйа бэрэсидьиэнэ Владимир Путин сорудаҕынан дойду тырааныспарын инфраструктуратын тупсарыыга туһуламмыт анал хааһына кирэдьиитэ бэриллэн атыылаһылыннылар. Маннык автобустар Арассыыйа 73 эрэгийиэнигэр бэрилиннэ.
Бу федеральнай бырагыраама чэрчитинэн ылыллыбыт автобустартан биэһэ биһиги улууспутугар бэрилиннэ. Санатан этэр буоллахха, хас да автобуһу биир кэмҥэ ылыыга үгүс кэпсэтии, туруорсуу түмүгэ буолара биллэр. Биһиги баһылыкпыт Анатолий Григорьев уонна улуус салалтата автобуһунан хаачыллыыбытыгар элбэхтик үлэлээтэ.
Бүгүн өрөспүүбүлүкэбит баһылыгыттан автобус күлүүстэрин улуус баһылыгын бастакы солбуйааччы Николай Александров тутта.
Улуус дьаһалтатын пресс-сулууспата иһитиннэрэринэн, биэс автобустан 3-һэ саҥалыы тииптээх ПАЗ уонна 2 ГАЗ-Сити диэн эмиэ саҥалыы оҥоһуллубут кузовтаах уонна салоннаах микроавтобус. Бу техникалар Сунтаар нэһилиэгин иһигэр уонна нэһилиэктэр икки ардыларыгар сүүрүөхтэрэ.
Яина ВЛАСЬЕВА