Улуус уһуйааннарын үлэһиттэрэ талааннарын көрдөрдүлэр

Бүгүн, ахсынньы 6 күнүгэр, «Партизан» норуот айымньытын театральнай киинигэр Арассыыйаҕа Педагог уонна Аҕа сүбэһит сылын чэрчитинэн, Сунтаар улууһун уһуйааннарын икки ардыларыгар «Көмүс баарыс» күрэс буолан ааста.

Күрэс «Чебурашка» оҕо сайдар киинин уонна Сунтаар улууһун үөрэҕириитин профсойууһун көҕүлээһиннэринэн ыытылынна.

Сиэйэттэн «Радуга», Аллыҥаттан «Үрүйэчээн», Күндэйэттэн «Күнчээн», Сунтаартан «Берёзка», «Ньургуһун», «Кыталык», «Солнышко», «Чебурашка» уһуйааннар үлэһиттэрэ күрэстэстилэр.

Дьүүллүүр сүбэҕэ бэрэссэдээтэлинэн улуус үөрэҕириигэ салалтатын оскуола иннинээҕи саастаах оҕолору иитэр-үөрэтэр отделын исписэлииһэ Урсууна Федорова үлэлээтэ.

Көрүү-күрэс үс хайысхаҕа: ырыа, үҥкүү, уус-уран тыл көрүҥнэригэр ыытылынна.

Ырыа хайысхатыгар кыайыылаахтар ааттарын сүктүлэр — «Солнышко» оҕо сайдар кииниттэн «Cайылык» диэн ырыанан Роман Кычкин уонна Дмитрий Григорьев.

Оттон үҥкүүгэ кыайыыны ситистилэр — дьиэрэҥкэй үҥкүүнэн Күндэйэтээҕи «Күнчээн» оҕо уһуйааныттан Саргылаана Спиридонова уонна Сардаана Николаева.

Уус-уран тыл көрүҥэр «Чебурашка» оҕо сайдар кииниттэн Августина Егорова уонна Людмила Николаева «Сайсары» драматтан быһа тардыыны көрдөрөн бастыҥнарынан ааттаннылар.

«Ньургуьун» оҕо сайдар кииниттэн Надежда Спиридонова уонна Диана Васильева «Дэйбиир» норуот ырыатын толорон Гран-при хаһаайыннарынан буоллулар.

 Дмитрий ЫМЫЧАНОВ

Читайте дальше